Расмий хабар: Икром Алибоев бошқа клубга ўтди
29 мар 2021 15:50
Янгиликлар

Расмий хабар: Икром Алибоев бошқа клубга ўтди

Ўзбекистон терма жамоаси аъзоси Икром Алибоев фаолиятини бошқа клубда давом эттиради.

Ўтган ҳафта Алибоев "Сеул"ни тарк этганини championat.asia сайтига маълум қилганди. Бугун Жанубий Кореянинг "Теджон Хана Ситизен" клуби ҳамюртимиз билан шартнома тузганини эълон қилди.

"Ушбу клубга ўтиш мен учун катта шараф. Клубга бироз кечроқ қўшилганим учун янги жамоадошларим билан тезроқ ўзаро тил топишиш учун тинмай меҳнат қиламан. Тезроқ спорт формамни тиклашга ва майдонда яхши ўйинларимни намойиш этишни истайман. "Теджон Хана Ситизен" клубига фойдам тегиши учун боримни бераман", - дейди Алибоев.

Маълумот учун, "Теджон Хана Ситизен" Жанубий Корея К2 Лигасида иштирок этмоқда. 4та турдан сўнг 6 очко тўплаган клуб 10та клуб орасида 3-ўринда бормоқда.

"Теджон Хана Ситизен" клуби 1997 йилда ташкил этилган. Ўз уй ўйинларини 40535 томошабинга мўлжалланган "Daejon World Cup" стадионида ўтказади. Айни пайтда жамоани маҳаллий мураббий Хух Жунг Му бошқармоқда.

Жамоа сафида бразилиялик Эдиньо, Бруно Баио ва Матеус Пато каби легионерлар бор.