Эслатиб ўтамиз, форвард УЕФА Миллатлар Лигаси доирасидаги Норвегияга қарши баҳсда (2:1) майдонга тушмагач, миллий жамоа ихтиёрини ўзбошимчалик билан тарк этган эди. Шундан сўнг у баёнот эълон қилиб, Жорже Жезушни унга берилган ваъдаларни бузганликда айблади. Хусусан, мураббий матбуот анжуманида Криштиану билан келишилган гапларни эмас, бошқа нарсани гапирганини таъкидлади.
Шу тариқа, 5 ноябрь куни Роналду терма жамоадаги фаолиятини якунлаганини расман эълон қилди.
— Баъзилар Роналдунинг халқаро майдондан кетишини бироз шон-шарафсиз юз берди, деб ҳисобламоқда. Нима деб ўйлайсиз, у келажакда бундан афсусланадими? Месси билан улкан ҳурмат-эҳтиром остида хайрлашишди. Роналду эса мураббий билан юз берган хунук баҳсдан сўнг кетди, Пирс Морган эса унинг PR-агентидек югуриб, мураббийни бундай даражада ҳеч қачон ўйнамаган ва нима ҳақида гапираётганини билмайдиган аҳмоқ, деб атади. Роналдунинг терма жамоадан кетиши ҳақида қандай фикрдасиз? — Мен ҳам шунга ўхшаш йўл тутганман ва бундан ҳанузгача пушаймонман (кулади). Баъзида ҳис-туйғуларга берилиб қарор қабул қиласан ва ўзинг истамаган шов-шувни келтириб чиқарасан.
Мен унга ҳамдардман. Ўша лаҳзада у қандай туйғуларни ҳис қилганини тушунаман. Бу энг яхши қарормиди? Ундай деб ўйламайман. Терма жамоадан шу тарзда кетганимдан ҳанузгача афсусланаман.
Умид қиламанки, у ўзи муносиб бўлган Португалия сафидаги сўнгги учрашувини ўтказади. Балки унинг учун махсус ўйин, ўртоқлик баҳси ташкил қилишар. Бунга чиндан ҳам умид қиламан. Чунки у Португалия таркибида фантастик ўйин кўрсатган, — дея жавоб берди Гуллит "Кристал Пэлас"нинг собиқ хўжайини Саймон Жорданнинг саволига.
