Бахтиёр Ашурматов: "Насаф"нинг селекция ишлари ҳайрон қолдиряпти"

Барча клублар имкониятларидан келиб чиқиб селекция ишларини олиб бораяпти ва шунга мос равишда олдига мақсад қўймоқда. Тажрибали мутахассис мазкур жараёнга қуйидагича фикр билдирди:

"Чемпионлик учун 4 та жамоани айтиб ўтаман. "Нефтчи" ва "Пахтакор" ўтган йилгидан ҳам кўра бу йил чемпионликка жиддий рақобат туғдиради. Доимгидек "Насаф", лекин улар олиб бораётган селекция ҳайрон қолдиряпти. Чунки етакчи ўйинчиларнинг кетиши барибир салбий таъсирини ўтказади. Академиядан чиққан футболчиларнинг етакчилар ўрнини тўлдиришига вақт керак бўлади. Шунга қарамай, "Насаф" жамоавий ўйин ва Рўзиқул Бердиевнинг кучи ҳисобига олтин медаллар учун курашади. Тимур Кападзе бошчилигидаги "Навбаҳор"ни ҳам айтиш жоиз. Демак, "Нефтчи", "Навбаҳор", "Пахтакор" ва "Насаф" жамоалари биринчи ўрин учун рақобат қилади, деган фикрдаман. Албатта, футбол — тахмин қилиш қийин бўлган спорт тури.

Трансферларга тўхталсак, "Андижон" яхши юришларни амалга оширяпти. Аммо чемпионлик учун курашиш қийин бўлган трансферлар. Дейлик, менда 1–2 йиллик жамоа тузишдек таассурот қолдиряпти. "Навбаҳор"да Кападзе ўз услубига мос бўлган футболчиларни йиғишга ҳаракат қиляпти. "Нефтчи"нинг ўйини қизиқ. Ёш мутахассис Ислом Исмоилов ўзидан қандай таассурот қолдиришини кўрамиз. Қизиқарли мавсум кутаяпман. Ҳамма жамоалар ўз олдига мақсад қўяди. Лекин мен санаб ўтган жамоалардаги трансферлар аниқ мақсадга йўналтирилган, дея оламан",- дейди Бахтиёр Ашурматов.