Жером Боатенг: "Германияда чемпионлик масаласи мартдаёқ ҳал бўлади"

Агар мюнхенликлар шу руҳда давом этадиган бўлишса, мартдаёқ чемпионлик масаласини ҳал қилишлари мумкин бўлади.

Жамоа марказий ҳимоячиси Жером Боатенг "Бавария"нинг бу ишни амалга ошира олишини айтиб ўтди:

- Ҳаммага маълумки, биз ҳар бир учрашувда фақат ғалаба қозониш мақсадида майдонга тушамиз. Жамоамиз жуда аҳил ва яхши шаклланган. Менимча, мартдаёқ чемпионат ғолиблиги масласини аниқ қилиб қўя оламиз. Аммо бунинг учун ҳеч бир баҳсда очко йўқотмаслигимиз талаб этилади. Олдинда бизни "Шалъке 04"га қарши қийин ўйин кутиб турибди. Бу учрашувнинг муросасиз ўтишига шубха йўқ. Рақиб анча жиддий бўлса-да, уларни мағлуб этишимизга ишонаман, - деди футболчи.

Эслатиб ўтамиз, бугун Тошкент вақти билан 22:30да "Бавария" Аллианц-Аренада Гелзенкирхеннинг "Шалъке 04" жамоасига қарши баҳс олиб боради. Қизиқ томони шундаки, бу учрашувда ака-ука Боатенглар дуелига ҳам гувоҳ бўламиз. Боиси, гелзенкирхенликлар сафида Жеромнинг укаси Кевин-Принц Боатенг ҳам тўп тепади.