"Ювентус" бош директори Маротта "Интер" билан музокара ўтказмоқда
03 oct 2018 13:41
News

"Ювентус" бош директори Маротта "Интер" билан музокара ўтказмоқда

"Ювентус" клуби бош директори Беппе Маротта фаолиятини "Интер"да давом эттириши мумкин.

61 ёшли италиялик олдинроқ 8 йиллик фаолиятдан сўнг 25 октябрда Турин клубини тарк этишини эълон қилган эди.

Маротта "Suning Group" ("Интер"га хўжайинлик қилувчи компания)нинг бош вакили Стивен Цанг билан Миланда учрашув ўтказган.

Томонлар "Интер"га ўтишни муҳокама қилишган ва Маротта бунга розилик берган. Бу ҳақда "Tuttosport" нашри хабар берди.

"Ювентус" Маротта даврида 7 маротаба чемпион бўлди, 4та Италия кубогини, 3та Италия Суперкубогини қўлга киритди ва икки бор ЕЧЛ финалига чиқди.

Олдинроқ, Маротта 9 йил "Сампдория"да ишлаган.