Юрий Лукин: "Бугунги ғалаба Шевченконинг туғилган кунига совға бўлди"

— Бугун ҳаво жуда иссиқ эди, — деди Юрий Павлович. — Бу эса ҳар икки жамоа аъзоларининг майдонда фаолроқ ва тезкор ўйин намойиш қилишига жиддий таъсир қилди. Ғалаба учун йигитларга раҳмат! Мухлисларимизни кайфиятини кўтара олганимиздан хурсандман.

Афсуски, қўлга киритилган охирги уч учрашувда ҳам биринчи бўлиб рақибларимиз ҳисобни очишди. Жамоамиз аъзолари бундан тушкунликка тушмай ўзларида ғалабага куч топа олганликлари кишига руҳ бағишлайди. Қолаверса, "Шўртан" таркибида бир қатор тажрибали ўйинчиларга эга, мамлакатимизнинг кучли жамоаларидан саналади. Рақибимизни пухта ўрганганимиз ва тўғри тактика танлаганимиз эвазига муҳим ғалабани қўлга киритдик.

Бугун Вячеслав Шевченконинг туғилган куни! Бетоблиги туфайли у Муборакда майдонга тушмаганди. Шу боис, унинг кайфиятини кўтариш учун Шевченкога майдонга тушишига имконият бергандик. Жамоадошлари бугунги ғалабани Славанинг туғилган кунига совға сифатида тақдим қилдилар.

Кейинги турда Тошкентга сафар қиламиз. 6 июнда "Локомотив"га қарши бўладиган  ўйинда ҳам мухлисларимизни албатта қувонтиришга ҳаракат қиламиз.