Янги ПФЛнинг ҳеч қачон тўғрилаб бўлмас хатоси - "Машъал"ни "чопгани"!

"Эътибор беринг, ҳозирги терма жамоамизга аъзо ва номзод дарвозабонларнинг деярли ҳаммаси "Машъал"дан чиққан: Элдорбек Суюнов, Санжар Қувватов, Ўткир Юсупов ва Жавоҳир Илёсов.

Суперлигада жорий мавсум ҳар тарафлама энг яхши дарвозабон бўлган Суюнов, бу борада энг яхши кетма-кетликда яна "Машъал" ниҳоллари Қувватов, Юсупов ва Илёсов.

Футболчиларни ҳали санаганим йўқ. Ҳимоячилардан энг барқарор ўйнаган Шерзод Аъзамов бўлди. Бу ҳам "Машъал"даги ниҳол. Суперлигада энг яхши чап қанот ҳимоячиларидан бири бўлган Фарруҳ Сайфиевни ҳам ўзбек футболига "Машъал" берган. Хорижда ўйнаётган саноқли вакилларимиз Фозил Мусаев ҳам "Машъал"дан чиққан аслида. Шомуродов ва Шукуров қайси жамоа тарбияланувчиси эканлигини барча билади. Бундай мисолларни келтираман деса клавиатурани соатлаб шақиллатса бўлади. Шундоқ жамоани элитадан йўқотдик! Бу ҳали бизга қимматга тушади...

Қандайдир тизимли клуб, ундаги футзал, аёллар ва ҳоказо ишларни талаб қилишдан аввал кучли ва барқарор жамоани ҚАДРлашни ўрганишимиз керак!!

Ўша янги келиб қолган мутахассислар айтаётган талаб ва 1-2 кунда яратиб бўлмайдиган шароитларни деб саноқли тузук жамоаларимизни ҳам йўқ қилаверсак, билмадим.

Футболда аввало футболни қадрлашни ўрганишимиз шарт! Профессионаллик аслида шу. Кимдандир профессионалликни талаб қилишдан аввал ўзи шунга монанд ва муносиб бўлиши, камида ўрнак бўлмоғи лозим!", - дея ёзади Шаҳбоз Беғамов ўзининг телеграмдаги каналида.