Ямалнинг ёшида Месси ва Роналдунинг статистикаси қандай эди?

"Барселона"нинг 17 ёшли қанот ҳужумчиси Ламин Ямал профессионал фаолиятидаги 100-ўйинини ўтказди. Юбилей учрашувини у УЕФА Чемпионлар лигаси ярим финалининг биринчи баҳсида Миланнинг "Интер" жамоасига қарши (3:3) ўтказди. Бу ўйинда испаниялик футболчи битта гол урди. Sky Sports Ямалнинг 17 ёшгача бўлган статистикасини "Реал" ва "Барселона"нинг ўтган йиллардаги ҳужумчилари Криштиану Роналду ва Лионел Мессининг кўрсаткичлари билан таққослади.

Манба маълумотларига кўра, Ламин Ямал профессионал даражада 100 та ўйинда 22 та гол урган ва 33 та голли узатмасини берган. Криштиану Роналду 17 ёшида катталар футболида 19 та ўйин ўтказиб, бешта гол урган ва тўртта голли узатма берган. Месси эса 17 ёшида тўққизта ўйин ўтказиб, битта гол урган.