Хитойлик журналист: "Менимча, ўйин дуранг бўлади"

Вакилларимизнинг бу галги рақиби Хитой терма жамоаси бўлади. Биласиз, ҳар иккала жамоа ҳам дастлабки турда бир хил 1:0 ҳисобидаги ғалабани нишонлади. Энди эса жамоалар ўзаро учрашувда ўз кучларини синаб кўришади.

Кеча миллий терма жамоамиз "Брисбен Страйкерс" ҳаваскорлар жамоаси уй учрашувларини ўтказадиган стадионда машғулот ўтказди. Машғулотни кузатиш учун уч нафар хитойлик журналист келгани ҳақида ёзиб ўтгандик. Улардан бири Пей Ли "sohu.com" деган сайтда ишлар экан. Машғулот пайтида бироз суҳбатлашдик ва фурсатдан фойдаланиб эртанги баҳс ҳақида унинг фикрлари билан қизиқдим.

"Биринчи ўйинда жамоамиз Саудия Арабистонидан кучли ўйнагани йўқ, шунчаки омад биз томонда бўлди. Дарвозабон битта пенальтини қайтарди, кейин ўйин охирларида гол уриб уч очкони қўлга киритдик. Ўзбекистон терма жамоаси биринчи ўйинини бошқа шаҳарда ўтказгани учун кўра олмадим. Шу боис нима дейишга ҳам ҳайронман. Футболчилардан фақат Анзур Исмоиловни кўпроқ эшитганман, холос. Чунки у бизнинг чемпионатда ўйнайди".

"Ўзбекистон билан ўйинга хитойлик журналист ва мухлислар кўп келадими?" - дея сўрадим ҳамкасбдан.

"Менимча, бизлар сон жиҳатдан кўпчилик бўламиз. Австралияда жуда кўп хитойликлар яшайди. Саудия Арабистони билан кечган баҳсда беш минг атрофида хитойлик мухлис кирди. Қолаверса, биздан 150 нафарга яқин ОАВ ходимлари бу ерга келишган. Шундай экан, одам кўп бўлишига шубҳа қилмайман", - дейди Пей Ли.

Хайрулла Холиқов
Брисбен