Хави: “Супер ўйин ўтказдик”

“Тан олиш керак, биринчи бўлимда ўйинимиз чиқмади. Рақиб жамоа ҳужумдаги йўлларимизни тўлиқ ёпиб ташлади, ҳимояда бехато ўйнашди. Эрон клуби шубҳасиз мусобақанинг асосий фаворитларидан бири ҳисобланади. Шунинг учун танаффусда айнан футболчилар руҳияти билан ишлашга ҳаракат қилдим. 

Иккинчи бўлимда бу эса ўзини оқлади. Акрам Афифнинг голидан сўнг, ўйинимизда туб бурилиш кузатилди. Бундан кейинги Ҳасан Ал Ҳайдоснинг кетма-кет урган голлари ўйин тақдирини узил-кесил ҳал қилди. Яратган вазиятларимизга яраша натижага эришдик деб ўйлайман. Ўйинимиздан келиб чиқиб айтишим мумкинки, мусобақадаги гранд жамоаларга бемалол қаршилик кўрсата оламиз”, - дейди Хави. 

Шунингдек, анжуманнинг иккинчи қисмида “Сепахон” устози Амир Галенои ҳам ўйиндан сўнгги фикрлари билан бўлишди.

“Албатта, рақибдан кучли ўйин кутгандик, лекин ҳисоб менимча ўйинга мос бўлмади. Биз шунчаки вазиятларимиздан унумли фойдалана олмадик. Бунинг устига асосий футболчимиз Суруш Рафиеи кутилмаганда жароҳат олди ва бу кейинги дақиқаларда биз учун минусга ишлади. Асосий вазифам тактикадаги ҳар бир хато устида ишлаш ва йўқотишларни тўлдириш”, - дейди 56 ёшли мураббий. 

Эслатиб ўтамиз, ушбу гуруҳдаги кейинги ўйинлар 3 март санасида бўлиб ўтади. Унда “Ал Садд” ўз уйида “Ал Айн”ни, “Сепахон” эса “Ал Насср”ни қабул қилади.