Хави Илкай Гюндоган билан боғланди

32 ёшли Германия терма жамоаси аъзоси Каталония клуби учун асосий нишонлардан бири ҳисобланади. Испания клуби молиявий ҳолати туфайли шартномаси якунланиш арафасига келиб қолган юлдузларни ўз томонига оғдиришга уринмоқда. Худди шундай амалиёт "Манчестер Сити" ярим ҳимоячиси билан ҳам амалга оширилмоқда.

Гюндоган "Этихад"даги битими тугаши биланоқ "Камп Ноу"га йўл олиш учун ҳатто камроқ маош олишга ҳам рози эканини билдирган. Бу ушбу келишув содир бўлиши эҳтимолини янада кучайтирди. "Шаҳарликлар"нинг бир қатор ўйинчилари жамоа бош мураббийи Пеп Гвардиола билан келиша олмай қолгани ҳақидаги миш-мишлардан сўнг "Барса" вазиятдан фойдаланиб, уларни Испанияга таклиф қилишга киришди.

Гюндоган жорий мавсумда АПЛ вакили сафида жами 34 та ўйинда майдонга туширилди ва 4 та гол уриб, худди шунча ассист қайд этди.