Хави Грасия: "Насаф"га қарши ўйинда ғалаба қозонишдан бошқа чорамиз йўқ"

Ўйин ҳақида

Хави Грасия:

-"Насаф"га қарши иккинчи ўйинимиз. Ҳозирда барча жамоаларга очко керак бўлмоқда. Бу ўйин биринчисидан фарқ қилишига умид қиламан. Бу гал олдинги сафардагидек 9 ўйинчи билан эмас 11 ўйинчи билан ўйнашни истаймиз. Ўйин тенг курашлар остида кечишига аминман. "Насаф" жуда шаклланган, рақобатбардош жамоа. Биз эса аввалги ўйиндаги хатоларни тўғирлашимиз лозим. Сўнгги ўйин ОЧЛдаги энг ёмон ўйинимиз бўлди.

Юсуф Абдуришаг:

-Албатта, бу ўйин биз учун жуда муҳим. Аввалги ўйинда икки киши кам бўлиб қолдик ва курашиш жуда қийин бўлди. Бу сафар эса уч очко олишга ҳаракат қиламиз. Асосий мақсадимиз ғалаба қозониш. Шу орқали гуруҳда биринчи ўринни эгаллашимиз мумкин бўлади.

-Барча жамоаларга очко керак дедингиз. Аммо агар бу ўйинда мағлуб бўлсангиз деярли барча нарса ёқотилади. "Насаф" эса гуруҳдаги ҳимояси энг кучли жамоалардан. Шу ҳақида гапирсангиз...

Хави Грасия:

- Айтганингиздек, "Насаф"га қарши ўйинда ғалаба қозонишдан бошқа чорамиз йўқ. Агар мағлуб бўлсак, мусобақа биз учун якунланади. Биринчи ўйиндаги тажрибамизда келиб чиқиб ҳаракат қиламиз. Ўйлайманки, бу вазифани уддалаймиз. Бу сафар ўтган галгидек тўққиз киши бўлиб ўйнамаймий деб ўйлайман. Икки киши кам бўлиб ҳам "Насаф"нинг ҳужумларига дош бера олдик. Ўйин охирида гол уришимиз ҳам мумкин эди. Шу сабаб ҳам ўйинга тайёрмиз деб айта оламан.

-Футболчилардаги ҳозирги босим мусобақа аввалидагисидан юқорироқми?

Юсуф Абдуришаг:

- Тўғрисини айтсам, бу жуда муҳим ўйин бўлганлиги сабаб бироз ҳаяжон бор. Аммо биз ўз тажрибамизга ишонамиз. Нима қилиш кераклигини ҳам биламиз. Майдонга чиқиб, ўз ўйинимизни кўрсатишимиз керак.