Владислав Хан: "Биз учун мавсум ёмон бошланмади"

Владислав Хан:

- Мавсум биз учун ёмон бошланмади. Сафардаги ишончли ғалаба бугунги ўйинимизни байрамона ўтказишимиз учун етарли эди. Чиройли футбол кўрдик: жанговор, ҳужумкор. Ростини айтсам, бугун биз ҳисоб учун ўйнадик. Ўртадаги фарқни сақлаб қолган ҳолда якунда бош совринни қўлга киритдик. Бекободда яхши жамоа шаклланганига гувоҳ бўлдик. Ўйлайманки, улар чемпионатда бундан ҳам чиройлироқ ўйин кўрсатишади.

- Иқтидорли ва ёш ҳужумчи Нилуфар Қудратовани алмаштиришингизга нима туртки бўлди?

- Майдон марказида рақиб футболчилари яхши ўйнашди. Тўғриси таваккал қилишни ҳоҳламадик. Нилуфар эса майдон марказидаги якка курашларда имкониятни бой бераверди. Шу сабаб алмаштирдик. У ҳали ёш. Тажрибалироқ футболчиларга имкон бердик.

- “Андижанка” билан “Металлург”ни солиштирганда қайси жамоа сизга кўпроқ хавф солади?

- “Андижанка” ўз анъанаси, тарихига эга бўлган жамоа. Кучсизлангандек кўринса-да, ҳар қандай вақтда рақибга нисбатан тажовузкор ўйин намойиш этиши мумкин. Лекин биз анча йиллардан бери доим мағлуб этиб келмоқдамиз. “Металлург” эса ёш жамоа ҳисобланади. Агар жамоа ўз ўйинларини бир маромда ушлаб туришни уддаласа келажакда яхши жамоа бўлиб шаклланади.