Вадим Абрамов Суриядаги устунлик, Тўхтахўжаев ва трансляция ҳақида гапирди

Ушбу баҳсдан олдин терма жамоамиз бош мураббийи Вадим Абрамовга бир нечта саволлар билан мурожаат қилдик.

- Дубайдаги йиғинга Ислом Тўхтахўжаев чақирилди. Бундай кутилмаган чақирувга нима сабаб бўлди? Кимдир жароҳат олдими?
- Тўхтахўжаев кутилмаганда чақирилмади. Буни олдиндан режалаштириган эдик. Шунчаки ҳозирги шароитда Хитойдан Дубайга учиб кела оладими ёки йўқми билмасдик. Барчаси 7 ноябрь куни ҳал бўлишини айтганди. Ҳеч ким жароҳат олгани йўқ. Ислом ҳужжатларни тўғрилади ва Дубайга учиб келди. Унинг ҳозирги ҳолатини билишни хоҳладик. Ўз клуби сафида сўнгги ўйинда гол урганини биламиз. Хитой биринчи лигасида ўйнашига қарамай Тўхтахўжаев биз учун етакчи футболчи бўлиб қолаверади.

- Сурия ҳақида қандай фикрдасиз? Уларга қарши бир неча марта ўйнаганмиз...
- Сурия ҳақида нима дейишим мумкин? Ушбу давлатдаги вазият туфайли терма жамоа доим бирга машғулот ўтказишмоқда ва бу борада устунликка эга. Ўйлашимча муносиб рақиб. ФИФА рейтингида Сурия биздан тепада, худди Ироқ каби. Шу боис қизиқарли ўйин бўлади. Сурияга қарши баҳсда қандай ҳолатда эканлигимизни кўриб оламиз.

- Афсуски ўйин трансляция қилинмайди...
- Билишимча ўйин трансляция қилиниши учун ҳам баҳсни бир соат кечга суришди. Ҳар ҳолда менга айтишларича учрашув барибир трансляция қилинади.