Вадим Абрамов: "Чемпионат тугашига иккита тур қолганида масъулиятни тўлиқ ҳис қилиб турибмиз"

Ўйиндан кейинги матбуот анжуманида "Динамо" бош мураббийи Вадим Абрамов иштирок этди.

- Ўйин ҳақида фикрингиз?

- Доимгидек мавсум охирларига келиб ҳамма учрашувлар қийин бўлиб боряпти. Бугун ҳам қийин ўйинлардан бирини ўтказдик. Негадир иккинчи голдан кейин футбол ўйнашни тўхтатдик. Ўзига яраша муаммолар юзага келди. Дарвозамиз томон бир нечта бурчак тўплари тепилди. Биз мухлислар учун ўйнаймиз ва баҳсни назорат қилишимиз мумкин эди.

- Улуғбек Ҳошимов биринчи таймдан кейин алмаштирилди.

- У жароҳатини даволаб энди майдонга қайтди. Катта паузадан кейин туширишга тўғри келди, шу боис бирданига тўлиқ ўйната олмасдик.

- Биламизки, сиз рақамларга кўп ҳам эътибор бермайсиз. Лекин бу "Динамо" бош мураббийи сифатида 101-ўйинингиз бўлди.

- Тўғри айтдингиз, мен статистикани кузатмайман. Чиндан ҳам бу 101-ўйиним эканлигини билмасдим. Эътибор учун раҳмат. Ғалаба қозонганимиздан хурсандман. Мухлисларга ҳам алоҳида раҳмат.

- Суперлига тугашига иккита тур қолди. Кўп футболчиларнинг "Динамо"дан кетаётгани ҳақида гаплар қулоққа чалиняпти. Масалан, Ратиньо ҳам кетар экан.

- Мен бу ҳақда олдин ҳам айтгандим, футболчиларимизга қизиқиш бор. Лекин бизнинг ишимиз уларни олиб қолиш. Ҳар йили мавсум охирига келиб бундай гаплар чиқади ва бу футболда нормал ҳолат. Ҳамма гап клуб қандай йўл тутишида.

- Навбатдаги баҳс "Қўқон-1912"га қарши кечади ва бу ўйин ҳам "Динамо" учун жуда муҳим. Чунки жамоа учинчи ўриндан пастга тушмаслиги лозим.

- Бундай масъулиятни жамоадаги ҳаммамиз тўлиқ ҳис қилиб турибмиз. Насиб қилса, чемпионат тугашига иккита тур қолди ва ҳар иккала ўйинни кўтаринки кайфиятда ўтказишни мақсад қилганмиз. Мухлисларни стадионга таклиф этиб қоламиз.

- Бугун Марко Станоевич ҳимоячи сифатида ўйнади.

- Чунки асосий ҳимоячиларимиз даволаниш билан банд. Шу боис Маркони ўйнатишга тўғри келди. Ва энг қизиғи, бугун ҳимоячимиз Дмитрий Плетнёв ўзининг тўртинчи сариқ карточкасини олди ва кейинги турни ўтказиб юборади. Бу эса яна битта муаммони келтиради. Станоевич кучли футболчи, тажрибаси ҳам катта. Айнан унинг тажрибасига таянган ҳолда ҳимояга қўйдик.

- "Динамо" таркибида муаммолар кўп, жароҳат олган футболчилар бор, таркиб оптимал кўринишда эмас. Шунга қарамай, жамоани қандай руҳлантиряпсиз?

- Руҳлантириш... Мураббийлик тажрибам шу қадар каттаки, тажрибага таянган ҳолда иш тутишимга тўғри келяпти.