Вадим Абрамов: "Каннаваро "Олтин тўп" олганини биламан. У зўр футболчи бўлган. Афсуски, бизда ўйнамайди, балки мураббийлик қилади"

- Ўйин ҳақида фикрингиз?

- "Сурхон" футбол ўйнайдиган жамоа ҳамда юқори ҳимояланишини билардик. Биз бундай баҳсга тайёр эдик. Биринчи таймда иккита гол уриб вазиятни қўлга олдик ва иккинчи бўлимда шу темпни туширмасликка ҳаракат қилдик. Тўғриси, танаффусдан кейин ҳисобни сақлаб қолишга ўйнаганимизни айтиб ўтаман. Самарқанддан мухлисларимиз келиб бизни қўллаб туришди, уларга алоҳида раҳмат. Олдинда танаффус юзага келади ва бу оралиқда яхшилаб тикланиб олишга эътибор қаратамиз. Сариқ карточкалар сабаб қайси ўйинчиларимиз кейинги ўйинда майдонга туша олмаслигини кўриб чиқамиз.

- "Пахтакор"га қарши Кубок учрашувидан сўнг эътибор чемпионатга қаратилишини айтган эдингиз.

- Мақсадимиз Кубок финалига чиқиш эди, лекин ярим финалда пенльтилар сериясида мағлуб бўлиб Кубокни тарк этдик. Бундан жуда хафамиз. Энди Суперлигада ўзимизни кўрсатишга тўғри келади. Хайрият руҳий тушкунликка тушиб қолмадик. Футболчиларимиз курашишда давом этяпти, бу эса ҳаммамизни хурсанд қиляпти.

- Миллий терма жамоага "Динамо"дан икки нафар футболчи таклиф этилди. Бу чақирув футболчиларга қанчалик таъсир қилди?

- Умумий ҳисобда турли терма жамоаларга биздан 6 нафар ўйинчи чақирилган. Шахсан мен жуда хурсандман. Футболчиларнинг ҳам кайфияти кўтарилди. Термага лойиқ ўйинчи чиқариб берсак бундан фақат хурсанд бўламиз.

- Ҳали расман эълон қилингани йўқ, лекин барибир сўрамасак бўлмайди. Фабио Каннаваронинг терма жамоамиз бош мураббийи этиб тайинланишига қандай қарайсиз?

- Каннаваро футболчилик пайтида "Олтин тўп" олганини биламан. У зўр футболчи бўлган. Афсуски, бизда ўйнамайди, балки мураббийлик қилади, яна нима дейишим мумкин. Ҳаммасини вақт кўрсатади.

- Жамоангиз кейин турни "Бухоро"га қарши ўтказади.

- 8 октябргача футболчиларга дам берамиз. Шундан кейин яна йиғилиб машғулотларни давом эттирамиз. 11 октябрь куни "Сўғдиёна"га қарши ўртоқлик учрашуви ўтказамиз. Билишимча, терма жамоа футболчилари Малайзиядан 14 октябрь куни қайтади. 18 октябрда эса "Бухоро" билан ўйнаймиз.