Украиналик қирол - Андрей Шевченко!

Андрей Шевченко 1976 йилнинг 29 сентябрида Украинада туғилган. Ҳужумчи. Украина терма жамоасининг собиқ сардори ва тўпурари.

2004 йилги "Олтин тўп" соҳиби. Икки марта Европа Чемпионлар Лигаси ва Италия чемпионатининг энг яхши тўпурари бўлган. "Милан" тарихидаги энг яхши иккинчи тўпурар. "Милан дербиси"да энг кўп гол киритган футболчи. Олти марта Украинанинг энг яхши футболчиси деб топилган. Украинада хизмат кўрсатган спорт устаси.

Унинг футболга илк қадамларини ўзи ўқиган 216-сонли мактабда қўйган. Болалар ўртасидаги турнирлардан бирида у "Динамо Киев" футбол мактаби мураббийларидан бири Александр  Шпаков назарига тушади ва шу тариқа "динамочилар" сафида шуғулланишни бошлайди.
Аввалига Андрейнинг ота-онаси унинг футбол билан шуғулланишига қарши бўлишган. Николай Шевченко фарзанди мактабни тамомлаганидан сўнг ҳарбий бўлишини истаганди. Лекин, Шпаков қаҳрамонимизнинг ота-онасини фарзандининг футболдаги келажаги борлигига ишонтира олади.


«Динамо» (Киев)

1994 йилнинг 8 ноябрь куни футболчи илк маротаба асосий таркибда майдонга тушди. 1994 йилнинг 1 декабрида эса "Днепр"га қарши ўйинда "Динамо"даги илк голини киритган.  
Келаси мавсумда эса жамоаси сафида 31 та ўйинда 16 та гол киритган ва мамлакат чемпионига айланган.
1997/98 йилги мавсумда "Барселона"га қарши ўйинда хет-трик муаллифига айланган. Орадан бир йил ўтиб эса Чемпионлар Лигаси тўпурарига айланган.
Биринчи марта "Динамо"да ўйнаганида у 106 марта рақиблар дарвозасини ишғол этган. 5 марта Украина чемпионлигини ва уч марта Украина Кубогини қўлга киритган. Шунингдек, 1998/99 йилги мавсумда энг яхши тўпурар бўлган.

“Милан”

1999 йилнинг май ойида Шевченко 25 миллион доллар эвазига “Милан”га кўчиб ўтади. Янги жамоаси сафида 1999 йилнинг 21 августида Италия Суперкубогида “Парма”га қарши ўйинда илк маротаба майдонга тушган. А Серияда эса 28 августда “Лечче”га қарши ўйинда дебют қилган ва ўша ўйинда “Милан” сафидаги илк голини киритган. Илк мавсумдаёқ футболчи 24 та билан Италия чемпионати тўпурарига айланган. Келаси мавсумда ҳам у ҳудди шунча голни рақиб посбонлари дарвозасига йўллаган. Лекин, ўшанда ундан иккита кўп гол киритган Эрнан Креспо чемпионат тўпурари бўлганди. 2002 йилда эса “Слован”га қарши ўйинда олинган жароҳат сабабли бир неча ойга сафдан чиқади.

Орадан бироз вақт ўтиб Чемпионлар Лигаси финалида “Ювентус”га қарши ўйинда ҳал қилувчи пенальтини тепади ва “Милан” ЕЧЛ ғолибига айланади. Шу тариқа, у Чемпионлар Лигасида ғолиб чиққан дастлабки украиналик футболчи сифатида тарихга кирган.

2004 йил Италия Суперкубоги соҳибига айланган. Айнан ўша йили Европанинг энг яхши футболчисига бериладиган “Олтин тўп”га эга бўлган. Шунингдек, “Украина қаҳрамони” унвонига ҳам ўша йили эга чиққан.



2004/05 йилги мавсумда жамоаси билан Чемпионлар Лигасининг финалигача етиб борган. Аммо, ўша ўйинда миланликлар “Ливерпул”га имкониятни бой бериб қўйгандилар.
2005 йилнинг 23 ноябрида “Фенербахче” дарвозасига битта ўйинда 4 та гол киритган.  Бундай натижани ЕЧЛда фақатгина Марко ван Бастен, Симоне Индзаги, Дадо Пршо, Рууд ван Нистелро, Лионел Месси, Бафетимби Гомис, Марио Гомес, Роберт Левандовски, Златан Ибрагимович ва Луис Адриано каби футболчилар қайд этишган.

2006 йилнинг 8 февраль куни “Милан” тарихидаги энг яхши иккинчи тўпурарга айланиб олади. Биринчи ўринда эса Гуннар Нордал туради.

12 май куни эса “Милан” президенти Силвио Берлускони футболчининг Англияга йўл олишни истаётганини айтди.


“Челси”

“Милан”даги 7 йилдан сўнг Шевченко Роман Абрамовичнинг “Челси”си сафига бориб қўшилишга қарор қилади. Унинг трансфери 30 миллион фунтни ташкил қилган. У дастлабки ўйинидаёқ рақиб дарвозасини ишғол қилишга муваффақ бўлган. Лекин, ўша Англия Суперкубоги учун кечган ўйинда “Челси” “Ливерпул”га 1:2 ҳисобида имкониятни бой бериб қўйган. Лекин, шунга қарамай унинг Англиядаги ишлари кўнгилдагидек кечмади. “Челси”даги икки йил давомида у икки марта белини операция қилдирган.




“Милан”га қайтиш

2008 йилнинг 23 августида “Челси” расмий сайти футболчининг “Милан”га ижарага берилишини маълум қилган. Жонажон жамоаси сафига қайтган футболчи у ерда 76-рақамда ўйнаган. Чунки, жамоада 7-рақам Пато томонидан банд қилинганди. Аммо, кетма-кет олинган жароҳатлар футболчини ўзини кўрсатишига имкон бергани йўқ. Миланликлар сафида унинг ишлари юришмади. 2009 йилнинг ёзида футболчи яна “Челси”га қайтиб кетади. Лекин, “аристократлар”нинг янги бош мураббийи Карло Анчелотти футболчини ўз режаларига киритмоқчи эмаслигини маълум қилган.

“Динамо”га қайтиш

2009 йилнинг 29 августида Шевченко “Динамо” билан 2+1 кўринишидаги шартномага имзо чекади.
2010/11 йилги мавсумда жамоасини сардор сифатида майдонга олиб туша бошлаган.



Терма жамоа

Андрей терма жамоа сафида илк маротаба 1995 йилда дебют қилган. Украина терма жамоаси билан ЖЧ-2006 ҳамда Евро-2012 каби катта турнирларда иштирок этган.

2006 йили Германияда бўлиб ўтган Мундиалда терма жамоаси билан чорак финалгача борган.



2012 йилда Польша ва Украина мезбонлик қилган Европа биринчилигида эса Шевченко жамоадошлари билан гуруҳда қолиб кетади. Гуруҳ босқичида Англия терма жамоасига қарши ўйин Шевченко учун Украина терма жамоаси сафидаги сўнгги расмий ўйин бўлиб қолган.

Футболчилик фаолиятини якунлаганидан сўнг бир муддат сиёсат билан шуғулланди.
Айни пайтда эса Украина миллий терма жамоаси мураббийлар штаби сафида Михаил Фоменкога ёрдамчи сифатида ишламоқда.

Википедия маълумотлари асосида тайёрланди