Туғилган кунингиз билан, Самвел Вячеславович!

Самвел Вячеславович, авваламбор туғилган кунингиз билан кенг жамоатчилик, шунингдек "Championat.asia" сайти ходимлари номидан табриклайман ҳамда Сизга узоқ умр, сиҳат-саломатлик ва мураббийлик фаолиятида омад тилайман!

Ҳаммамиз тушуниб турибмиз, Сизни олдинда жуда муҳим баҳслар кутмоқда. Жаҳон чемпионати саралаш босқичида ҳал қилувчи ўйинлар мана энди бошланади. Терма жамоамиз биринчи навбатда 12 июнь куни Теҳронда Эрон терма жамоаси билан куч синашади.

Ўзбекистон терма жамоасининг гуруҳдаги вазияти ёмон эмас, ҳали имконият бор ва бунинг учун кейинги учта баҳсда ғалаба қозонишимиз керак бўлади. Ҳар бир бош мураббий каби Сиз ҳам ўзингизга маъқул келган футболчиларни танлаш ва ўйнатиш ҳуқуқига эгасиз. Бу борада Сизнинг ишингизга аралаша олмаймиз.

Терма жамоамиз қандай таркиб ва тактикада ўйнамасин, мухлислар биринчи навбатда ғалаба кутишади. Фақат уч очкогина одамларни севинтиради. Умид қиламизки, қолган учта ўйинда максимал натижага эришиб, Ўзбекистон милллий терма жамоасини жаҳон чемпионатига олиб борасиз. 

Биламизки, "Пахтакор"да ишлаган пайт қўл остингиздаги жамоа айниқса иккинчи давра яхши ўйин кўрсатиб, кўпроқ очколарни қўлга киритар ва якунда чемпион бўларди. Биз терма жамоадан ҳам мана шундай ўйин ва натижа кутиб қоламиз. 

Бу дунёда амаллаб бўлмайдиган ишнинг ўзи йўқ. Шундай экан, жаҳон чемпионатига чиқиш ҳам ушалмайдиган орзу эмас. Фақат ва фақат меҳнат ва қаттиқ ишлашгина бизни мундиал сари етаклай олади. 

Самвел Вячеславович, Сизни яна бир бор туғилган кунингиз билан табриклайман. Ўйлайманки, кузда биз - ўзбекистонлик мухлислар терма жамоамизнинг тарихда илк бор жаҳон чемпионатига чиққани гувоҳи бўламиз. 

Кўп сонли мухлислар номидан Хайрулла Холиқов.