Трансферлар: Бугунги қайноқ хабарлар

Эътиборингизга бугунги янгиликларни тақдим этишни лозим топдик. Мархамат, амалга ошадиган ва ошиши мумкин бўлган трансфер янгиликлари билан танишиб олинг.

Жордан Айю "Сошо" нишонида
"Сошо" жамоаси "Олимпик" Марсел форварди Айю ҳизматларига эхтиёж сезмоқда. Ганалик хужумчи намойиш этаётган ўйин "Сошо" раҳбариятига маъқул келган. Шу боисдан жамоа уни қишдаёқ қўлга киритиш ниятида. Аммо марселликлар Айюни қўйиб юборишларига ишониш қийин. Шунга қарамасдан "Сошо" январда Жордан Айюга расмий таклиф билан чиқишни режалаштирмоқда.

Тер Штеген учун курашга "Арсенал" ва "Ювентус" ҳам қўшилишди
Мёнхенгладбахнинг "Боруссия" жамоаси дарвозабони Марк Андре тер Штегенни анча вақтдан буён Европанинг бир қатор гранд жамоалари ўз сафларида кўриш ниятидалар. Бу курашда "Барселона"нинг имкониятлари юқорироқ баҳоланаётган эди. Аммо сўнгги хабарларга асосланиб айтишимиз мумкин-ки, тер Штеген учун кечаётган курашда "Барса"га осон бўлмайдиган кўринади. Боиси ушбу кипер хизматларидан "Арсенал" ва "Ювентус" жамоалари ҳам фойдаланишмоқчи. "Тўпчилар"га муқим дарвозабон етишмаётган бўлса, "Юве" Буффон учун ворис изламоқда. Кўриниб турибдики, тер Штеген учун кураш борган сари қизиб бормқода. Бу курашда омад қайси жамоага кулиб боқар экан…

"Реал Мадрид" Паулинйога "совчи" юбормоқчи
"Реал"га Англия пойтахтидан футболчи сотиб олиш ёқиб қолган кўринади. Гарет Бейл ва Лука Модрич каби ўйинчилардан сўнг "қироллик клуби" "Тоттенхем"дан яна бир футболчи харид қилиш ниятида. Бу сафар "Реал" нишонида - Паулинйо. Мадридликлар Паулинйога январдаёқ таклиф билан чиқишни мўлжаллаб туришибди.

"Фиорентина" Неманя Видични олиб келмоқчи
Фиорентиналиклар ишончли ўйин кўрсатувчи ҳимоячига эхтиёж сезишмоқда. Италянлар жамоани кучайтириш учун Неманя Видични сотиб олишмоқчи. "Ман Юнайтед" сафида бир неча йиллардан буён юқори савияли ўйин намойиш этиб келаётган Видич фаолиятини Италияда давом эттиришга рози бўлиши номаълум. Боиси у фаолиятини, айнан, "Манчестер Юнайтед" сафида якунлашни исташини айтиб ўтган эди. Лекин жамоада мураббий ўзгарганини инобатга олсак, ҳар қандай вазият юз бериши мумкин.

Ламела ҳамда Мата энди "Интер"га ўтишадими?
Италиянинг машхур "Corriere dello Sport" нашри тарқатган охирги маълумотларга қараганда, "Интер" Хуан Мата ҳамда Эрик Ламелани сотиб олишга жиддий киришди. Жамоа спорт директори Аусилио айни пайтда Лондонда бўлиб турибди. У нима қилиб бўлса-да ушбу икки футболчини Миланга олиб кетмоқчи.

Гризман "ПСЖ"ни танлаган кўринади
"Реал Соседад" жамоасида ажоиб ўйин кўрсатаётган Антони Гризман охир-оқибат Франция пойтахтига кўчиб ўтадиганга ўхшайди. Футболчи таътил кунларидан унумли фойдаланиш мақсадида Парижга келди ва "ПСЖ" машғулотларини кузатди. Маълумотларга қараганда, Гризман "ПСЖ"га ёзда ўтади. Унинг тахминий трансфер нархи 30 миллион еврони ташкил этади.

"Боруссия Д" Левандовскига ўринбосар топди
Дортмунднинг "Боруссия" жамоаси ёзда жамоани тарк этадиган Роберт Левандовскига ўринбосар топди. "Сариқ-қоралар"нинг эътибори ёш серб хужумчисига тушди. "Андерлехт" сафида тўп тепаётган Александар Митрович Юрген Клопга ёқиб қолган. Хатто "Боруссия" скаутлари Митровичнинг ўйинини кузатиш учун "Андерлехт" стадионига ҳам ташриф буюришди. Катта эхтимол билан Александар Митрович ёзда Дортмундга кўчиб ўтади.

Каспер Слот Германияга кўчиб ўтади
"bold.dk" интернет портали тарқатган хабарга кўра Каспер Слот бундеслигага кўчиб ўтишга яқин турибди. 21 ёшли Даниялик футболчи ҳаракатлари "Ганновер" ва "Волфсбург" каби жамоаларга ёқиб қолган. Ушбу дат ўғлонининг трансфер нархи бир миллион евро атрофини ташкил этади. Ёш ярим ҳимоячининг қишдаёқ немис жамоаларидан бири билан шартнома имзолаши кутилмоқда.

Зохиржон Акрамхонов тайёрлади.