Токио-2020 да тўп тепишингга ишонасанми? Унда ўзингни синаб кўр!

Сир эмаски, 1997 йил ҳамда ундан кейин туғилган футболчилар Япония мезбонлигида ўтадиган Олимпиаданинг футбол турнирида иштирок этиши мумкин. Айни пайтда Токиога бориши мумкин бўлган футболчиларнинг кенгайтирилган рўйхати эълон қилинган ва улар тайёргарликни давом эттиришяпти. Яхши томони шундаки, Жакартада бўлиб ўтадиган Осиё Ўйинларида ҳам мана шу таркибнинг бир қатор аъзолари бор.

Бироқ ЎФА бу билан чекланиб қолмоқчи эмас. Суперлига ўйинлари тўлиқ трансляция қилина бошлагач, чемпионатда тўп сураётган футболчиларни кузатиш ва уларнинг салоҳиятини таҳлил қилиш имконияти пайдо бўлди. Бироқ Про-Лига, Ёшлар Лигаси, U18 чемпионатида, шунингдек, футбол академиялари, мактабларида ҳам бир қатор умидли футболчилар тўп суради.

Шундан келиб чиқиб, Жаҳон Чемпионати вақтида ЎФА комиссияси Токиога бориши мумкин бўлган футболчиларнинг кенгайтирилган рўйхатига кирмаган, бироқ ўзини кўрсата олишига ишончи бор футболчилар ўртасида танлов эълон қилади. Бунда Про-Лига клублари футболчилари, Ёшлар Лигаси вакиллари ўз омадини синаб кўриши мумкин бўлади.

Про-Лига клублари ёзги танаффусни июль ойида ўтказади. Демак, мазкур лига клублари айнан июль ойида синовда бўлиши мумкин. Қолган футболчилар эса Жаҳон Чемпионати вақтида ўз омадини синаб кўриши мумкин.

Мураббийлар штаби ҳамда комиссия вакилларига маъқул келган футболчилар асосий жамоа машғулотларига жалб қилиниши мумкин. Мақсад — футболда фаолиятини давом эттираётган, аммо айрим сабабларга кўра эътибордан четда қолаётган футболчиларга ҳам имконият тақдим этиш. Ажаб эмас, уларнинг орасидан ҳам салоҳиятли футболчилар чиқиб қолса.

Ўзини кўрсатиш истагида бўлган футболчилар media@the-uff.com манзилига ўзлари ҳақларида маълумот юборишлари керак бўлади.