"Сурхон" Тошкентда йиғин бошлади, Фарҳод Тожиев шу ерда

Бу йил ўз олдига кучлилар сафига чиқишни мақсад қилиб қўяётган термизликлар, шунга монанд таркибни кучайтиришга уринмоқда. Мураббийлар штаби айнан мазкур Тошкентдаги йиғин чоғида селекция ишларига катта эътибор қаратишни режалаштирган. Дарвоқе, «Сурхон» жамоаси «Туркистон» меҳмонхонасида истиқомат қилмоқда. Машғулотлар кунига икки маҳалдан, «Дўрмон» ва «NBU-Осиё» стадионида ўтказиш режалаштирилган.

Таркибдаги ўзгаришлар келадиган бўлсак, ҳозирда ўттиз нафар футболчи жамоа йиғинида иштирок этмоқда. Тошкентдаги йиғиннинг илк кунлариданоқ, жамоа сафига Руслан Матниязов, Азамат Аҳмедов, Аббос Пўлатов, Ориф Абдуғаниев («NBU-Осиё»), Иброҳим Абдуллаев, Алишер Мирзаев («Обод»), Бекзод Мирзамуродов («Қизилқум»), Нажмиддин Нормуродов, Сирожиддин Қўзиев, Дилшод Хушбаков («Насаф»), Шерзод Жалилов («Сўғдиёна»), Тимур Усмонов («Локомотив»), Равшан Хурсанов («Навбаҳор»), Фарҳод Тожиев («Динамо») каби футболчилар келиб қўшилди.

Ҳозирча мураббийлар уларни кўрикдан ўтказаётганини таъкидлаш лозим. Термизликлар Тошкентдаги йиғин чоғида синов-назорат учрашувларини ҳам ўтказишни режалаштирган. Хусусан 14 февраль куни, Жиззах «Сўғдиёна» жамоаси билан, 16 февраль куни Наманганнинг «Навбаҳор» жамоасига қарши ҳамда 20 февралда Муборакнинг «Машъал» жамоасига қарши ўртоқлик ўйинлари бўлиб ўтади.

Айтишларича, «Сурхон» жамоаси про-лига баҳслари бошлангунига қадар Тошкентда йиғин олиб боришни мақсад қилган.