"Сурхон" мавсумни 19 ёшли футболчилар билан бошлайдими?

Биринчи катта масала — легионер футболчи олдидаги қарздорлик. Бубанья ФИФАга мурожаат қилган. Катта ташкилот куннинг исталган қисмида "Сурхон" учун трансфер тақиқи қўйиши мумкин. Ҳатто эртагаёқ тақиқ кучга кирса ҳам, "Сурхон" 26 февралгача катта эҳтимол билан кўп нарсага улгурмайди. 

Иккинчи катта масала — клубнинг янги ҳомийлар қўлига ўтиши. Бу иш ҳам амалга ошганича йўқ. Амалдаги раҳбариятдан қолиб келаётган қарздорлик масаласини ҳал этиш асосий муаммо бўляпти. Юридик тарафдан олиб қараганда ҳам олдиндаги 11 кун бу ишларни ҳал қилиш учун етмаслиги мумкин. 

Ўз-ўзидан савол келиб чиқади: "Сурхон" трансферлар амалга ошира олмаса нима бўлади? Агар шундай ҳолат юзага келса, у ҳолда "Сурхон" ўтган мавсумдаги футболчилари билангина шартномани узайтириши ва фақатгина U-18 жамоаси футболчилари билан шартнома тузиши мумкин бўлади. Савол кетидан яна савол бор: бу ҳолатда клуб 2022 йилги мавсумда Суперлигада жон сақлаб қола оладими?