Суперлига U-18. "Нефтчи" мавсумни йирик ғалаба билан бошлади

Ўйинда Шерзод Зокиров бош мураббийлигидаги фарғоналиклар 5:2 натижасида ғалаба қозонишди.

Ўйинда деярли майдон эгаларини устунлиги остида ўтди. Бироқ илк бўлимда "Нефтчи" жамоаси жуда кўплаб голли вазиятлардан фойдалана олмади. Баъзи вазиятларда рақиб ҳимоячилари хавфни қийинчилик билан бартараф этишган бўлса, бошқа ҳолатларда ҳужумчиларга бироз аниқлик етишмади. Шу тариқа биринчи бўлимда дарвозалар дахлсизлиги сақланиб қолди.

Иккинчи бўлимда жамоалар ҳужумкорликни янада оширишди. Мураббийлар штаби таркибда ўзгартиришларни амалга оширишди. Бу ҳам ўйин суратига ўз таъсирини ўтказди. "Нефтчи"нинг голларини захирадан майдонга тушган Муҳаммад Умаржонов бошлаб берди. Ҳисоб очилгач, майдон эгалари голларни кетма-кетлигини бошлашди. Фарғоналиклар сафидан Дилшод Умирзақов Қарши жамоаси дарвозасига 3 марта гол киритиб, хет-трик қайд этди. Шунингдек, Аброр Иномов ҳам бир марта ўз ҳисобига гол ёздириб қўйди. Меҳмонлар сафидан эса Сардорбек Тураев ва Алпомиш Муров жавоб голларини киритишди. Якуний ҳисоб, 5:2 "Нефтчи" ғалабаси!