Суперлига. Бугун Термизда воҳа дербиси, Олмалиқда Қосимов - Абрамов тўқнашуви

Суперлига, 3-тур
"Сурхон" – "Насаф"
13 март 2020 йил. Термиз. "Сурхон" стадиони. 16:00
Ҳакамлар: Аҳрол Рисқуллаев, Расулжон Фозилов, Максим Нехочин, Абдурашид Худойберганов
Назоратчи: Андрей Тамбовцев
Комиссар: Шерзод Ражабов

Дастлабки икки турда юз фоизли натижа қайд этган "Насаф" Термизда "Сурхон" меҳмони бўлади.

Воҳанинг бу икки клуби Ўзбекистон чемпионатида 18 бор тўқнаш келишган. 14та учрашувда "аждарлар" 3 очко олишган. "Сурхон" фақат битта ўйинда ғолиб бўлган. Қолган учта учрашувда дуранг қайд этилган.

"Сурхон" Термизда охирги 5та учрашувда "Насаф"га фақат мағлуб бўлган. Сўнгги бор "Сурхон" 1999 йилда "аждарлар"ни таслим қилишган экан.

Ўтган йилги ўзаро ўйинларнинг иккаласида ҳам "Насаф"нинг қўли баланд келган. Рўзиқул Бердиев шогирдлари Қаршида 2:0, Термизда 3:1 ҳисобида ғалаба қозонишган.

“Насаф” футболчилари Бобир Абдихолиқов ва Шароф Муҳитдинов бу мавсум иккала турда гол уришга муваффақ бўлишди.

АГМК – "Бунёдкор"
13 март 2020 йил. Олмалиқ. ОКМК спорт мажмуаси. 18:15
Ҳакамлар: Вадим Агишев, Абдуҳамидилло Расулов, Олим Абдувосилов, Ҳусан Музаффаров
Назоратчи: Сайфиддин Ирматов
Комиссар: Диёр Имомхўжаев

Бу мавсумда иккита дуранг ўйнаган АГМК иккита ғалабага эришган "Бунёдкор"га қарши.

Ушбу клублар ҳозирга қадар чемпионат доирасида 24 марта тўқнаш келишган. 16 ўйинда "қалдирғочлар" зафар қучишган бўлса, Олмалиқ шаҳри жамоаси 3 бор ғалаба қозонган. Бешта баҳсда дуранг қайд этилган. Ўзаро ўйинларда "Бунёдкор" 42та гол уриб 21та гол ўтказиб юборган.

Ўтган йил бўлиб ўтган ўйинларда меҳмонда ўйнаган жамоа ғалаба қозонган. Олмалиқда "Бунёдкор" 1:0 ҳисобида зафар қучган. Тошкентда эса АГМК 2:0 ҳисобида ғолиб бўлган.

"Бунёдкор" мавсумни Термизда "Сурхон" устидан ғалаба билан бошлади (3:1), сўнгра Тошкентда "Машъал"ни таслим қилди (1:0). АГМК эса "Металлург" билан ўз майдонида ва сафарда "Сўғдиёна"га қарши баҳсда бир хил ҳисобларда дуранг ўйнади (1:1).

АГМК ўз уйида охирги 6та ўйинда "Бунёдкор"ни мағлуб эта олмай келмоқда - 2 дуранг, 4 мағлубият. Сўнгги бор АГМК ўз майдонида "Бунёдкор"ни 2013 йилда мағлуб этган.

Ўтган йил "Бунёдкор"да ўйнаган Санжар Турсунов АГМКга ўтди. Олмалиқ жамоасида тўп тепган Ғулом Ҳайдар Ғуломов ва Расул Йўлдошев эса "қалдирғочлар" сафига кўчиб ўтишди.