"Сўғдиёна"га ё янги мураббий келади ё Даврон Файзиев қайтади

Жиззахликлар ҳозирча иккинчи даврага ҳозирликни Жиззахда бош мураббийсиз олиб боришмоқда. Жамоа эртага биринчи лига вакили "Зомин"га қарши ўртоқлик учрашувини ўтказади. 

"Сўғдиёна" бу мавсум биринчи даврада 17 очко жамғарди ва ҳозирча 13-ўринни эгаллаб турибди. Жамоа охирги иккита учрашувда мағлуб бўлганидан кейин бош мураббий Даврон Файзиев ишдан бўшатилди. 

Шундан бери футболчилар бош мураббийсиз машғулот ўтказиб келишмоқда. Машғулотларни олиб бораётган Диёр Файзиевда (Даврон Файзиевнинг акаси) тегишли лицензия бўлмагани учун бош мураббий бўлиб ишлай олмайди. У фақат ёрдамчи бўлиши мумкин. 

Бизга етиб келган гап-сўзларга қараганда клуб раҳбарияти иккита мураббийга таклиф билан чиққан, бироқ ҳозирча аниқ жавоб олмаган. Лекин тез орада янги бош мураббий келиши кутиляпти, аммо айнан ким келиши номаълум. Бу - футбол ва унда ҳамма нарса бўлиши мумкин, шу боис янги мураббий топилмаган тақдирда Даврон Файзиевнинг ўзи "Сўғдиёна"га қайтиши мумкин.

Х.Холиқов