Снейдер: "Мбаппе келаси йил "Олтин тўп"ни қўлга киритади, бунга деярли 100 фоиз ишончим комил"

"Реал" ва "Интер" жамоаларининг собиқ яримҳимоячиси Уэсли Снейдернинг фикрича, Килиан Мбаппе келаси йил "Олтин тўп"ни қўлга киритади.

"Ҳозирги кунда натижалар қандай баҳоланаётганини ҳисобга олсак, Мбаппе кейинги мавсумда уни ютишига деярли 100 фоиз ишончим комил. Бундан ташқари, у энди ҳақиқий ҳужумчига айланди, қанотдагига қараганда яхшироқ ўйнамоқда. "Мадрид"га Холанд каби ўйинчи керак эмас.

Вини "Олтин тўп"ни эҳтимол, бир йилдан сўнг қўлга киритади. Иккаласида ҳам бунинг учун барча имкониятлар мавжуд. Эҳтимол, Винисиус икки йил олдин ҳам ғалаба қозониши мумкин эди. Мен ўшанда [2010 йилда] мукофотга лойиқ эдим, лекин бунга ачинмайман. Бошқалар нима деб ўйлашини билмайман, аммо мен Чемпионлар Лигасидаги ғалабадан кўпроқ хурсанд эдим. "Олтин тўп"ни қўлга киритиб, ўша мавсумда ЧЛни юта олмаганимда бундай бўлмасди" - деди Снейдер.