Шота Арвеладзе: "Қўқон-1912"га яхши хордиқ тилайман. АГМК - "Насаф" учрашувини мухлис сифатида томоша қиламан..."

"Ярим финалга йўл олган жамоалар чемпионатда кучли бешликдан жой эгаллашди. Мавсумни барқарор ўтказган клублар ўз кучларини кўрсатишди. Ҳа, оғир мавсум ўтказдик. Кўп тўхталишлар бўлди, футболчилар, мураббийлар, уларнинг яқинлари касалланди. Шунга қарамай мавсумни барқарор ўтказишга ҳаракат қилишди. АГМК, "Насаф" "Қўқон-1912" клублари юқори ўринлар учун кураш олиб боришди. Ўйинга жуда яхши ҳозирландик. Майдон биз хоҳлайдиган футболни намойиш этишга имкон бермаслигини билардик. Шогирдларим олдида шляпамни ечаман. Футболчиларга раҳмат айтаман, улар бор кучларини беришди, кескин ўйинда йирик ҳисобда ғалаба қозондик. Кўплаб вазиятлар юзага келтирдик, рақибга деярли имконият бермадик. Финалга йўл олдик, ютуққа ҳақли эдик. Мезбонларга эса соғлиқ, яхши ҳордиқ чиқариб, кейинги мавсумга яхши тайёргарлик кўришларини тилаб қоламан",- дейди Шота Арвеладзе.

- Финалда ким билан тўқнаш келишни истайсиз?
- Кубок баҳсларини тахмин қилиш қийин. Грузияда бу йил қуйи дивизионнинг икки жамоаси финалда ўйнади. Шу боис бу борада фикр билдириш осон эмас. "Насаф" ҳам, АГМК ҳам яхши спорт формасида. Мухлислар қаторида мен ҳам ўйинни кўраман ва рақибимиз ким бўлишини билиб оламан.

- "Пахтакор"да ҳам келажакда грузиялик футболчиларни кўрамизми? Шахсан сизнинг қўл остингизда грузиялик иқтидорлар ўйнайдими?
- Қийин савол. Лекин, бўлиши мумкин. Излаш керак. Улар маҳаллий футболчилар бир неча карра устун бўлиши лозим. Масалан, Драган Черан адашмасам Ўзбекистонда бешинчи йил ўйнамоқда. Кўпроқ маҳаллий ўйинчилар билан ишлашга ҳаракат қиламиз. Иқтидорлар бу ерда ҳам кўп.

- Жалолиддин Машариповнинг Саудия Арабистони чемпионати вакили "Ал Насср"га ўтиши ҳақида фикрингиз қандай?
- Ўйлайманки, сизлар билан миш-мишларни муҳокама қилиш учун йиғилмаганмиз. Аниқ фактлар ҳақида гапирганимиз маъқул. Бугун ажойиб учун "Қўқон-1912" жамоасига миннатдорчилик билдираман.