"Шўртан": Таътил тугади, навбат тайёргарликка

Мана энди 13 июлдан эътиборан иккинчи давра баҳсларига тайёргарлик босқичи бошланади. Жамоа вакиллари дастлаб, Ғузордаги қароргоҳда машғулотларга киришишади. Бу ердаги тайёргарлик ишлари 19 июлга қадар олиб борилади. Айнан ўша куни вилоятда фаолият кўрсатаётган Олий ёки биринчи лига жамоаларидан бири билан ўртоқлик синов-назорат учрашуви ўтказилиши режалаштирилган. Шундан кейин барчага бир кунлик дам берилади ва “Шўртан” аъзолари пойтахтда жам бўлишади. Тошкентдаги машғулотлар 28 июлгача давом эттирилади. Бу вақт оралиғида Мухтор Қурбонов бошчилигидаги жамоа 23 ва 26 июль кунлари Олий лиганинг икки  вакили билан ўзаро куч синашиб кўради. Пойтахт йиғинининг сўнгги кунида мураббийлар ва футболчилар ЎФФ қошида фаолият кўрсатаётган “Футбол-Мед” тиббий муассасасида ўз соғликларини кўрикдан ўтказишади. Шундан сўнг, “Шўртан” жамоаси Ғузорга қайтади ва иккинчи давранинг “Нефтчи” (Фарғона) билан бўладиган дастлабки учрашувига ўз қароргоҳида тайёргарлик ишларини олиб боради.

Таркибдаги ўзгаришларга келсак, бу борада бир қатор янгиликлар юз бериши кутилмоқда. Биринчи даврада клуб раҳбарияти ва мураббийлар гуруҳи ишончини оқлай олмаган баъзи бир футболчиларга жавоб берилиши мумкин. Ўз-ўзидан эса кетганлар ўрнини янги футболчилар ҳисобига тўлдириш режаси ҳам ишлаб чиқилган.

Айнан ушбу ҳолатга 13 июлдан бошланадиган йиғин давомида ойдинлик киритилади.