“Шўртан” мавсумдаги илк йирик ғалабасини қўлга киритди

Шу тариқа, ғузорликларнинг олий лигадаги 8 ўйинлик ғалабасиз серияси якунланди. Охирги марта “Шўртан” биринчи даврада, 11-турда Косонсойда “Навбаҳор” устидан ғалабага эришганди (1:0). Шундан сўнг бўлиб ўтган кетма-кет саккиз ўйинда “оқ бўрилар” рақибларини таслим қила олмай келишди.

Клубнинг ўз майдонидаги охирги ғалабаси эса анча олдин қайд этилган. 20 апрель куни олий лиганинг 6-тури доирасида “Шўртан” “Қизилқум”ни таслим қилганди (2:0). Қарийб беш ойлик танаффусдан сўнг ғузорлик мухлислар ўз севимлилари иштирокидаги ғалабали ўйиннинг гувоҳига айланишди.

“Шўртан” учун “Гулистон” устидан қозонилган ғалаба мавсумдаги дастлабки йирик ғалаба бўлди. Охирги марта клуб ўтган йилнинг ёзида рақиб устидан камида уч тўп фарқи билан ғолиб чиқа олганди. 2012 йил 17 августида Ғузорда “Андижон” тор-мор этилганди - 6:1. Шундан сўнг “Шўртан” олий лигада 19та ўйин ўтказди ва рақибни йирик ҳисобда таслим қила олмади. Ниҳоят 28 сентябрь оқшомида бу қора анъанага ҳам барҳам берилди.

Бундан ташқари “Шўртан”нинг ўзи учун яхши анъанаси давом этмоқда. Зоир Тўрақулов бошчилгидаги клуб олий лигада кетма-кет учинчи ўйинда ҳам гол ўтказгани йўқ. Дастлаб Ғузорда “Бунёдкор” билан, сўнгра сафарда “Олмалиқ” билан 0:0 ҳисобида дуранг ўйналганди. “Гулистон” ҳам “Шўртан” дарвозасига йўл топа олгани йўқ.