“Шўртан” бугун Тошкентда йиғилади

Бу ҳақда клуб матбуот хизмати сайтимизга расман маълум қилди. Мазкур йиғин иккинчи давра ўйинларига тайёргарликнинг сўнгги босқичи саналади. Режага кўра машғулотлар Қибрай туманидаги “Дўрмон” стадионида кунига икки маҳалдан олиб борилади.

Хабарингиз бўлса керак, давралар оралиғида жамоани бир қатор етакчи футболчилар тарк этиб, улар айни пайтда ўзга клуб йиғинларида иштирок этмоқда. Аммо клуб расмийларининг айтишларича, кетган футболчиларнинг барчаси билан “Шўртан” клубини амалда шартномаси мавжуд. Шу боис ҳозирча ҳеч кимни расман “Шўртан” билан хайрлашди дея олмаймиз.

Бош мураббий Зоир Тўрақулов Тошкентдаги йиғин мобайнида бир янги номларни кўрикдан ўтказади. Жамоа сафига қўшилиши кутилаётганларнинг кўпчилиги, асосан ёш истеъдодли футболчилар эканлиги айтилмоқда. Йиғин чоғида клуб мураббийлар штаби ўртоқлик учрашувларини ташкил этишни ҳам эътибордан четда қолдирмаяпти. Масалан “Шўртан” 25 июль куни олий лига вакили “Сўғдиёна” билан, 27 июлда эса биринчи лиганинг етакчи клубларидан бири бўлган “НБУ-Осиё”га қарши синов-назорат баҳсини ташкил этишга келишиб олган. Айнан мана шу ўйинлар орқали Тўрақулов асосий таркибнинг негизини аниқлаб олишни режалаштирган.


Исломбек Рустамбеков