Сергей Шевченко “Андижон”ни тарк этди

Олинган маълумотларга кўра, Сергей Шевченко бугун юртига қайтиб кетди. Бунга сабаб сифатида жамоадаги вазият ижобий томонга ўзгармагани айтилмоқда. Клубнинг ижрочи раҳбарлари билан фикрлари бир жойдан чиқмаган мураббийнинг режаси ҳам табиийки амалга ошмади. Мухлислар Сергей Яковлевични жамоада қолишини қанчалик истамасин, мураббий ватанига қайтишга қарор қилди. Чунки унинг клуб спорт директори Александр Шапран билан чиқиша олмаган. Афтидан Шапран “Андижон”га бошқа мураббийни олиб келиш ниятида.

Айтиш мумкинки, Шевченко айрим сабабларга кўра, расман “Андижон” мураббийи сифатида бўлмасада, машғулотларни ўзи ўтказиб, селекция ишларини ҳам унинг ўзи олиб борганди. Ўйин пайтида эса мураббийлар штабидан ўрин олмай келаётган мураббий қисқа фурсат ичида “Андижон” билан хайрлашадиган бўлди. Албатта бундай бўлишини Шевченконинг ўзи ҳам кутмаган бўлса керак.

Дарвоқе, Шевченконинг яқин ёрдамчиси Борис Белошапка ҳам “Андижон”да дарвозабонлар билан ишловчи мураббий сифатида фаолият юритиб келаётганди. Маълум бўлишича, ушбу мутахассис ҳам юртига қайтиб кетган.

Ёзда клуб раҳбариятида иш бошлаши кутилган Мўминжон Мақсудов ва Рустам Абдиевга ҳамон жамоада иш бошлаши учун буйруқ чиқмаган. Бу эса жамоани бошсиз чавондозга ўхшатиб юбормоқда. Ўзининг 50 йиллик юбилей тўйида яна биринчи лигага тушиб кетиш ҳавфи остида турган “Андижон”да парокандалик юз берган деса ҳам бўлади. Афтидан жамоа олдинги йўл қўйилган хатолардан керакли хулосалар чиқариб олмаган кўринади. Кўрамиз, вазият қандай тус оларкин.