Санжар Турсунов: "Навбаҳор" — чемпионлик учун кураша олади"

Олмалиқликлар сардори ва етакчиси Санжар Турсунов шу куни ўйиннинг энг яхшиси бўлди, дея оламиз. Дастлаб унинг бурчакдан узатиб берган тўпи рақиб ҳимоячисига тегиб дарвозага кирган бўлса, орадан кўп ўтмай қанотдан рейд уюштириб зарба йўллади ва Юсуповдан қайтган тўпни Рубен Санчес голга айлантирди. Табиийки, учрашувдан сўнг Санжар Турсуновнинг фикрлари билан қизиқдик. 

"Умуман олганда ўйин яхши ўтди. Агар қандайдир сабабларга кўра ўйин бузилмаса, бундай беллашувлардан Ўзбекистон чемпионати ютади. Кераксиз нарсалар ўз таъсирини ўтказаверса, бу кетишда қийин бўлади. Ҳар турда ҳакамлар билан боғлиқ муаммолар. Кимдир атайлиб, яна кимдир билмасдан хато қилади. Инсонийлик фактори сабаб хато бўлса, тушунамиз. Лекин аксинча қилинса, футболимизга зарар",- дейди Санжар Турсунов. 

- "Навбаҳор" рақиб сифатида қандай таассурот қолдирди?
- "Навбаҳор" таркибида яхши савиядаги футболчилар йиғилган. Бундай таркиб билан улар чемпионлик учун кураша олади.

- Ўзбекистон чемпионатида қайси томонга ўзгариш бор?
- Агар футболга алоқадор бўлмаган ишлар учрамаса,чемпионатимиз қайсидир томонлама кучайган. Пастки жамоалар ҳар томонлама молиявий дейсизми, таркибми юқоридагиларга яқинлашяпти. Суперлига эса ривожланишда давом этиши керак. 

Абдулазиз Искандаров ёзиб олди