Салим Зокиров: “Мақсадимиз юқорига интилиш”

— Бугун ўйин борасида нима дея оласиз?

— Аввало мезбонларни ғалаба билан табриклайман. Шогирдларим ҳам бугун яхши ҳаракат қилишди. Уларнинг ўйинидан кўнглим тўлди. “Ифтихор” жамоасига кучли футболчилар жамланган – Мансур Саидов, Акмал Холматов, Шерзод Ҳакимов, Ориф Мамажонов каби ўйинчилар суперлигада ҳам бемалол ўйнаб кета олишади.

— Бугун майдонга асосан ёш футболчиларни тушурдингиз. Хусусан, дарвозабон Жасур Абдуллаев асосий таркиб ўйинчиси эмас.

— Чиндан ҳам бугун ёшларга имконият беришга қарор қилдим. Жасур ёш дарвозабон бўлишига қарамай, бугун ўзини кўрсата олди. Унинг ҳаракатларидан қониқиш ҳосил қилдим. 20 апрель куни ўз майдонимизда “Лабса” билан ўйнаймиз. Шуни инобатга олган ҳолда бир қатор етакчи футболчиларга дам бердим.

— “Ёзёвон” мавсумни юқори нотада бошлади. Ҳозирча жамоа Про-лига “В” гуруҳида етакчилик қилмоқда.

—  Мақсадимиз юқори даражага интилиш. Ёзёвонлик мухлисларни хурсанд қилиш. Бугун бизни бевосита стадионда қўллаб-қувватлаб турган ишқибозларимизга ўз миннатдорчилигимни изҳор этаман.

Исроил Мамажонов тайёрлади