Рустам Мирсодиқов: "Бугун ҳисоб 10:10 бўлиши ҳам мумкин эди"

"Бундай майдонда футбол ўйнаш мумкин эмас. Бугун менимча ўйин ҳеч кимга ёқмади. Ушбу ўйиндан роҳат олганим йўқ, тўғри ёшларимиз гол уришди, лекин қониқиш ҳисси йўқ", - деб гап бошлади Рустам Мирсодиқов.

- Жамоанинг мақсади қандай?
- Бизнинг доимий мақсадимиз битта - чиройли ўйин кўрсатиб ўз мухлисларимизни хурсанд қилиш. Олдимизга 5 ёки 6-ўринни олиш каби мақсадлар қўйилмайди.

- Бугун майдон ҳолати ёмон бўлса ҳам футболчиларингиз яхши ўйнашгадек туюлди.
- Таркибимизда бир нечта футболчилар жароҳат олишган: Ковалёв, Одилов, Абдуллаев, Мамадалиев ва Нурматов эса терма жамоада. Асосий таркибнинг 5та футболчиси йўқ. Шу боис ёшларни майдонга туширдим, улар борларини бериб ўйнашди.

- "Сўғдиёна" ўтган турда ҳам 5:4 ҳисобида ютганди. Кўпчилик турли гап сўзлар чиқарди, ваҳоланки бундай майдонда кўп голлар бўлиши табиий...
- Тўғри айтдингиз. Бундай майдонда ҳисоб 10:10 бўлиши ҳам мумкин эди. Баҳсни кўрмаганлар бошқача ҳаёлга боришлари мумкин. Бунақа майдонда ҳисоб 15:11 бўлиши ҳам мумкин...Бу футбол. Барча йўлланган зарба голга айланиши ҳам мумкин.

- Мутахассис сифатида "Сўғдиёна"нинг ўйинига қандай баҳо берасиз?
- Кейинги турда Жиззах клуби Фарғонада "Нефтчи"га қарши ўйнайди. Агар "Сўғдиёна" бугунги биринчи бўлимда кўрсатган ўйинини намойиш этса рақибга анча қийинчилик туғдиради. "Сўғдиёна"да яхши имконият бор.