Рўзиқул Бердиев: "Бугун водийдан қайтиб, яна водий сари отланадиган бўлдик"

Барча учрашувлар ниҳоясига етганидан сўнг қуръа ташланди ва унинг натижасига кўра жамоамиз яна бир бор водийга сафар қиладиган бўлди. "Аждарлар" Ўзбекистон Кубоги 1/4 финалида Наманганнинг "Навбаҳор" жамоаси меҳмони бўлади. Маросим якунлаганидан сўнг жамоа бош мураббийи Рўзиқул Бердиевнинг қуръа натижалари ҳақида фикрлари билан қизиқдик.

“Кеча Андижонда бўлиб ўтган учрашувдан сўнг бугун тушга яқин Қаршига етиб келдик. Кейинги босқичда ўз уйимизда, мухлисларимиз қаршисида ўйнаймиз деб умид қилгандим, лекин қуръа шуни кўрсатдики бугун водийдан қайтган бўлсакда яна водийга кетадиган бўлдик.

Барчага маълум, бу йилги Ўзбекистон кубоги финали Наманганда бўлиб ўтади. Табиийки мезбонлар ҳам шунга яраша ўйин кўрсатади. Ваҳоланки "Навбаҳор" жамоаси ўз уйида яхши футбол намойиш этади. Мухлислар қизиқарли ва шиддатли баҳсга гувоҳи бўлишади деб ўйлайман" — дейди Рўзиқул Бердиев.

Эслатиб ўтамиз, "Навбаҳор" — "Насаф" учрашуви 12 декабрь куни соат 16:00да Намангандаги "Марказий" стадионида бошланади.