Роналдунинг севимли рақиби: Нега "МЮ" юлдузи "Атлетико Мадрид"га қарши ўйнашни яхши кўради?

Декабрь ойида Чемпионлар лигаси 1/8 финалига қуръа ташлаш маросими бўлиб ўтган ва унда дастлаб "Манчестер Юнайтед" Париж Сен-Жерменга қарши рўбаро келиши керак эди.

Яъни, катта эҳтимол билан Лионель Месси ва Криштиану Роналду қарама-қаршилигида ушбу турнирдаги сўнгги баҳс бўлиши мумкин эди. 

Бироқ "техник муаммо" майдонда икки "ўзга сайёралик"нинг ўзаро тўқнашувини гувоҳи бўлиш учун кутишда давом этишимиз кераклигини англатиб қўйди, чунки қайта қуръа натижасида "Юнайтед" Испания чемпиони "Атлетико Мадрид" билан жуфтлик ҳосил қилди ҳамда бошқа жанжал олови алангаланишига сабаб бўлди.

Бу икки клубнинг ўзаро ўйинлар тарихи унчалик олис эмас, улар фақат 1991 йилда Кубок эгалари кубогида бир-бирлари билан тўқнаш келишган.

Бироқ Диего Симеоне ва унинг "Атлетико"даги шогирдларининг кўпчилиги Роналдуга қарши қандай ўйнаш кераклиги ҳақида кўп нарсани билишади. 

Дарҳақиқат, чоршанба оқшомида "Ванда Метрополитано" стадионида бўлиб ўтган тўқнашув 13 йиллик жанжалга яна бир боб қўшади. 

"Роналду "Атлетико"нинг энг даҳшатли туши бўлди", дейди "Реал Мадрид" мухбири Марио Кортегана.

"Атлетико" мухлислари ҳар доим уни масхара қилишга, унинг ҳаёти ва фаолиятининг ҳар бир тафсилотини кулги қилишга ҳаракат қилишган, аммо Роналду доимо юксакка кўтарилаверган".

"Юнайтед" ҳужумчиси "Реал" ва "Ювентус"даги фаолияти давомида "Атлетико"га қарши бошқа рақибларга қараганда кўпроқ, аниқроғи 31 марта тўқнаш келган.

У ушбу учрашувлар давомида 25 та гол урган, шу жумладан 4 та хет-трик ва 9 та голли узатма қайд этган.

Роналду 2014 ва 2019 йиллар оралиғида кетма-кет беш марта "Атлетико"нинг Чемпионлар лигасидаги умидларини чиппакка чиқарган, шу боис "Рожибланкос" мухлислари нима сабабдан португалиялик юлдузни кўргани кўзи йўқ эканлигини ҳис қилишингиз мумкин.

Ушбу рақобат ҳақида гап кетганда, уч йил муқаддам “Ювентус” ва “Атлетико” ўртасидаги Чемпионлар лигаси 1/4 финалини энг яхши хулоса сифатида қабул қилиш мумкин.

Роналду "Бянконери"га қарши Мадриддаги биринчи ўйинида мағлуб бўлганида "Ванда Метрополитано"нинг маҳаллий мухлислари томонидан шафқатсизларча масхара қилинди.

У бунга жавобан беш бармоғини камерага қўйиб, Чемпионлар лигасида неча марта чемпион бўлганини барчанинг ёдига солди.

Шунингдек, Криш ўйиндан сўнг журналистларга “Юве” Туриндаги вазиятни ўзгартириб юборишига ишончи комил эканлигини айтди. 

"Улар кечада 2:0 ҳисобида мағлуб бўлган бўлса-да, унинг ўзига бўлган ишончи юқори эди", дейди ОАВ ходимларидан бири. — У натижадан ғазабланганини айтди, лекин у жавоб ўйинида нималарга қодирлигини билгани учун жилмайиб турарди". 

Португалиялик футболчи Чемпионлар лигасида ўзининг унутилмас ўйинларидан бирини ўтказди, чунки у хет-трик қайд этиб, "Ювентус"ни ярим финалга олиб чиқди.

"У футболдаги тирик илоҳ", - дейди Роналдунинг "Манчестер Юнайтед"даги собиқ жамоадоши Рио Фердинанд Туриндаги треблдан сўнг.

"Атлетико"нинг навбатдаги даҳшатли ўйинидан сўнг Симеоне тилини тишлаб қолди.

"Матрасчилар" қотили учинчи голини урганидан сўнг, Симеоненинг ярасига туз сепиш учун биринчи ўйинда аргентиналик мутахассиснинг қилиғига тақлид қилди.

Хуллас, чоршанба оқшоми Мадридда беш карра “Олтин тўп” соҳибини дўстона кутиб олиниши амримаҳол.

Роналду тўққиз йил давомида Ла Лигада ғалаён кўтарган ўйинчи бўлмаслиги мумкин, аммо Симеоне 37 ёшли футболчининг оёғидан нималар келишини яхшироқ билади. 

“Криштианудек футболчига қарши тайёргарлик кўриш қийин масала. У дарвоза олдидаги ҳайвон”, - дейди Симеоне 2019 йилги Чемпионлар лигаси гуруҳ босқичидан ўрин олган “Атлетико” – “Ювентус” учрашуви олдидан. — У ақл бовар қилмайдиган рекордлар қайд этган ва ҳар қандай голли вазият юзага келаётганда уни назорат қилиш ҳар доим мушкул бўлган. У ўтмишда бизни азоб-уқубатларга дучор қилди".

Гарчи "Юнайтед" сафида сўнгги саккизта ўйинда атиги битта гол урган бўлса ҳам, Роналду "Атлетико" бошига қора булутлар келтира олишига ишонади.

Шуни ҳам ёдда тутиш керакки, агарда Роналду гуруҳ босқичида 6 бор рақиблар дарвозасини ишғол қилмаганида, "Юнайтед" ҳаттоки 1/8 финалга ҳам чиқа олмасди.

Хуллас, севимли рақибига қарши навбатдаги учрашув олдидан Роналду яна бир бор сюрприз тайёрлаган бўлса, ҳайрон бўлманг.