Роналду тарихий рекорд ўрнатди. Бунга Мбаппе сабабчи

"Ал Насср" ва Португалия терма жамоаси ҳужумчиси Криштиану Роналду Килиан Мбаппенинг "Реал"га ўтиши ҳақида фикр билдирди.

Франциялик футболчи 3 июнь куни Мадрид клуби билан 5 йиллик шартнома имзолади. Аввалроқ футболчи эркин агент сифатида ПСЖни тарк этганди.

"Томоша қилиш навбати менда. "Бернабеу"ни ларзага келтиришингни интиқлик билан кутаман", – деб ёзди Роналду Мбаппенинг пости изоҳида.

Криштианунинг ушбу изоҳига 4,5 миллиондан ортиқ фойдаланувчи "лайк" босди.  Бу Instagram тарихидаги рекорд кўрсаткичдир.

Мбаппе 2017 йилдан 2024 йилгача ПСЖда ўйнаган. У парижликлар сафида жами 308 ўйин ўтказиб, 256 та гол урган ва 108 та голли узатмани амалга оширган.

Роналду "Реал" тарихидаги энг яхши тўпурар (450 та гол). У "қаймоқранглилар" либосида 2009 йилдан 2018 йилгача ҳаракат қилган.