"Реал" ҳужум чизиғида ажойиб ўйинчилар йиғилган" — Гвардиола

Хабарингиз бор, эртага Чемпионлар Лигасида мавсумининг энг қизиқарли ўйинларидан бири бўлиб ўтади. "Манчестер Сити" ўтиш босқичининг биринчи қисмида "Реал"ни қабул қилади. Манчестерликлар бош мураббийи Пеп Гвардиола жамоасини қанчалик қийин ўйин кутаётганини тушуниб турибди.

"Реал" Ла Лигада биринчи ўринда ҳамда "Атлетико" ва "Барса" билан кураш олиб бормоқда. Уларни мағлуб этиш учун иккита яхши ўйин ўтказишимиз керак бўлади. Ҳа, бизга қуръа қийин келди. Аммо 24 жамоа ичида 22-ўринни эгаллаганингизда, тақдирдан илтифот кутиш қийин.

Жавоб ўйинини уйда, мухлисларинг кўз олдида ўтказиш ҳар доим ёқимли, бироқ биз бунга лойиқ бўлолмадик.

Албатта, биз аввалгидек барқарор ҳолатда эмасмиз. Лекин йиллар давомида жуда яхши тўп тепган футболчиларимга ишонаман.

Уларнинг ҳужум чизиғида ажойиб ўйинчилар йиғилган. Улар турлича – қисқа ва узун паслар билан ҳужумга ўтади. Биз ўз ўйинимиз ҳақида ўйлашимиз керак.

Агар биз ғалаба қозонсак, бу мавсумнинг қолган қисми учун катта туртки бўлиб хизмат қилади. Мен қандай ўйнашимиз кераклигини биламан... Биламан, йигитлар ҳам эртанги ўйинни интиқлик билан кутишмоқда", – деди Гвардиола.

Эслатиб ўтамиз, "Манчестер Сити" – "Реал" беллашуви 11 февралдан 12 февралга ўтар кечаси 01:00 да бошланади.

Аввалроқ "Манчестер Сити" "Байер" футболчилари учун 200 млн евро ҳозирлаб қўйгани маълум бўлган эди.