Равшан Ҳайдаров: "Гулистон" ва "Қизилқум"нинг имконияти тенг"

"Ўйин жанговор руҳда ўтди. Тезкор гол урганимиз бизга ёрдам берди", - деб гап бошлади Равшан Ҳайдаров.

"Гулистон" жамоасига ғалаба зарур эди, шу боис улар олдинга ўтишга мажбур эдилар. Қарши ҳужумларда бир қатор вазиятларга эга бўлишди, тан олиш керак омад биз томонда эди. Алишер Шоғуломов ҳисобни тенглаштириши мумкин эди, дарвозабонимиз ўзини кўрсатди. Иккинчи бўлимда ҳисобда олдинда борганимиз учун тўпни ўзимизда сақлаб туриб вазият бўлишини кутдик. Бир қатор вазиятлардан шогирдларим фойдалана олишмади. "Гулистон" жамоаси курашга чанқоқлиги билан ажралиб турди, футболчиларга маҳорат етишмаслиги мумкин, аммо ўйинга чанқоқлиги, шижоати туфайли жамоага хурматим баланд.

Рустам Қодиров ва Хуршид Йўлдошев каби тажрибали ўйинчилар асосий фигуралар, олдинда эса ёш ҳужумчи Алишер Шоғуломов агар ўз устида ишлашда тўхтаб қолмаса яхши ҳужумчи бўлиб етишади.

Сўнгги турда "Гулистон" ва "Қизилқум" олий лигада қолиш учун курашишади. Менимча имкониятларни тенг деб биламан. Ким ўша куни яхшироқ тайёр бўлса, олий лигада қолишни ким кўпроқ истаса ўша жамоа ғолиб бўлади.


Энвер Гафаров ёзиб олди.