Равшан Ҳайдаров: "Бу босқичгача етиб келиш ҳеч кимга осон бўлмади"

Ўзбекистон терма жамоаси бош мураббийи Равшан Ҳайдаров матбуот анжуманида КХДР кучли, тартибли ва интизомли жамоалигини таъкидлади.

Равшан Ҳайдаровнинг айтишича, Шимолий Корея барча чизиқда бирдек интизомли ўйнайди ва шунинг учун ҳам ярим финалгача етиб келди.

"Шимолий Кореяни аввало Жаҳон чемпионатига чиққани билан табриклайман. Бу босқичгача етиб келиш ҳеч кимга осон бўлмади. Бундай турнирда 4та ўйин ўтказган жамоада ҳар қандай йўқотиш бўлади. Жароҳатлар, карточкалар, йўқотишларга сабаб бўлади. Бизда ҳам кичик жароҳат олган футболчилар бор. Мутахассислар ишлашяпти. Лекин, Акром Комилов карточкалари туфайли ўйинни ўтказиб юборади", - дейди Равшан Ҳайдаров

Равшан Ҳайдаровга кўра, гол ўтказмасдан ўйнаш вақти ҳам келди, Ўзбекистон ҳар ўйинда гол ўтказиб юбормоқда.

"Бу атайлаб қилинмайди. Футбол хатолардан иборат ва биз буни яхши тушунамиз. Хатолардан ўрганамиз ва ўйинни яхшилаймиз".



Шимолий Корея терма жамоаси бош мураббийи Ан Йе Гун эса унинг жамоасида жароҳат олганлар ёки карточкалари тўпланиб қолганлар йўқлигини айтди.

"Карточкалар ярим финал олдидан куйиб кетди ва таркибда бу борада муаммо йўқ. Жароҳат олганлар ҳам йўқ. Биз 4 та ўйинни Нейпьидода ўтказганимиз ва ярим финалнинг янги шаҳар ва янги шароитларда ўтказилиши муаммо туғдирмайди. Биз кеча Янгонга учиб келдик. Кеча кечга бориб тикланиш бўйича машғулотлар ўтказилди. Бугун яна машғулот. Ҳаммаси жойида. Ўзбекистон кучли жамоа ва қийин ўйин бўлади. Лекин, чорак финалдаги иродали ғалаба бизга қўшимча мотивация беради. Тўғри, биз 120 дақиқа ўйнадик, яна 1 кунимиз йўлда ўтди. Лекин, бизни ҳеч нарса чалғита олмайди. Ғалаба учун боримизни берамиз. Ўзбекистон билан ўйин осон бўлмайди. Осиёнинг энг кучли жамоаларидан. Баланд бўйли ва тезкор ҳужумчилари, айниқса, хавфлидир", - дейди Ан Йе Гун.

Эслатиб ўтамиз, Ўзбекистон ва КХДР ўртасидаги ўйин 20 октбярь куни Тошкент вақти билан соат 14:00да бошланади.
 

ЎФФ матбуот хизмати