Расул Йўлдошев: "Гол уришимизга ҳаддан ташқари иштиёқ тўсқинлик қилди"

Шиддатли ва муросасиз кечган учрашувга шу куни фақат гол етишмади, холос. "Бунёдкор" футболчиси Расул Йўлдошев сайтимиз мухбири билан суҳбатда ушбу жиҳатга тўхталди ва ўйин борасидаги фикрларини билдирди. 

- "Сўғдиёна" билан ўйинлар доим қийин кечган. Буни сўнгги йиллардаги натижалар ҳам айтиб турибди. Рақиб жисмонан кучли ҳисобланади. Шунга яраша тайёргарлик кўргандик. Ҳа, қишки йиғинларда ҳаракатларимиз қовушмаган бўлиши мумкин. Чунки тайёргарлик пайтида турлича таркиблар синовдан ўтказилади. Бундан ташқари, ўйинлардан олдин юкламалар берилади. Бизга Туркия йиғини катта ёрдам берди, деб ўйлайман. "Заря", "Волгарь" каби кучли жамоалар билан тенгма-тенг ўйнадик. Гарчи натижа ўхшамаган бўлсада, ўзимизга ишончимиз ортди. 

Учрашувдан олдин Жиззах жамоасининг фаворит эканлиги ҳақидаги гапларга эътибор бермадик. Улар ўтган мавсум иккинчи ўринни эгаллашгани учун шундай дейилган бўлса керак. Биз ғалабага лойиқ эдик. Кўп вазиятлар яратдик. Менимча гол уришимизга ҳаддан ташқари иштиёқ тўсқинлик қилди. Мураббийимиз совуққонлик билан ҳаракат қилишимизни таъкидладилар. Бир кун олдин клубимиз президенти Меҳриддин Раззоқович Абдуллаев жамоамиз билан учрашдилар. Ёш жамоа бўлишимизга қарамасдан ишонишларини, ҳар бир учрашувда чиройли футбол кўрсатишимизни айтдилар. Бу катта мотивация берди. Албатта бундан ҳам яхшироқ ўйнашимиз керак. Жамоавий ўйинимизни янада шакллантириб кучли бўлиб майдонга чиқишимизга аминман.