"Рақиб мураббийи билиб қолмаслиги учун уларни мағлуб этишнинг калитини айтмайман"

Германияда ПСЖ жамоаси "Штутгарт" меҳмони бўлади. Ана шу ўйин олдидан парижликлар устози Луис Энрике фикрларини билдириб ўтди.

"Мен классик "ўнлик" билан ўйнамайман. 10-рақамдаги ҳар қандай ўйинчи менинг тизимимда қийналарди. Биз бўш жойларни бошқача эгаллаймиз.

Бизда 3 хил позицияда 7 нафар ҳужумкор ўйинчи бор. Шунинг учун мен уларнинг қандай ҳужум қилишларига, қандай ҳимояланишларига қарайман. Биз кўп қирралилик ва ўйинчилар жамоани қандай кучайтириши мумкинлигини қидирамиз.

Мен футболчиларимдан мамнунман, уларнинг барчаси бизга керак. Аммо "тўққизлик", "ўнлик" ёки "ўн биринчи рақам" тушунчалари - мен бунга аслида қабул қилингани каби қарамайман.

"Штутгарт"нинг ўйинларини таҳлил қилиб, улар ўтган мавсумни иккинчи ўринда якунлашганидан ажабланмадим. Уларда юқори савияли ўйинчилар бор.

Бу яхши ҳужум қиладиган ва яхши ҳимояланадиган жамоа. Улар сифатли босим ўтказишади ва уларга қарши ўйнаш қийин. Улар тўртинчи саватчада, аммо уларнинг савияси ушбу тоифадаги аксар жамоалардан юқорироқ.

Бу ўйин қийин бўлади, боз устига биз уларнинг майдонида тўп тепамиз. Муваффақият калити? "Штутгарт" устози Себастьян Хёнесс билиб қолмаслиги учун бу ҳақда ўйиндан олдин ҳеч нарса демайман. Сизларга ушбу беллашувнинг нозик томонларини айтиб бермоқчи эмасман", - деди ПСЖ бош мураббийи.