Раде Петрович: "Ўйинни 60 дақиқа назорат қилиб ғалаба қозондик"

- Ўйин ҳақида фикрингиз?

- Сафарда чиройли ўйин кўрсатиб ғалаба қозондик. Ўйинни 60 дақиқа назорат қилдик деб ўйлайман. "Шўртан" дарвозабони ўз дарвозасини яхши қўриқлади. Бизда ҳам имкониятлар бўлди. Рақибда ҳам кўп имкониятлар юзага келди. Баҳс қийин кечишини билардик. Ғузор жамоаси Жиззахда бизга анча қаршилик кўрсатиб дуранг қайд этганди. Умуман олганда "Шўртан" яхши жамоа.

- Бугун жамоа бош мураббийи Иван Бошковични майдонда кўрмадик.

- Бош мураббийимизда сариқ карточкалар тўртта бўлганди, шу боис қайдномага киритилмади ва захира ўриндиғида ўтирмади. Бундай ҳолат ўтган йил ҳам содир бўлганди. Биз биргаликда уч йилдан бери ишлаяпмиз, Бошковични яқиндан биламан. Унинг эҳтиросларга берилишини тушунаман, чунки доим ғалаба қозонишни хоҳлайди. Кейин ўйинда бош мураббий жамоа билан бирга бўлади.

- Иккинчи таймда "Шўртан" анча яхши ҳаракат қилди. 

- Мен ҳам шу фикрдаман. Айтдим-ку, биз 60 дақиқача ўйинни назорат қилдик. Кейин устунлик мезбонлар томонга ўтди. Бу жамоанинг охирги ўринда бораётгани мени ҳайрон қолдиради, чунки "Шўртан" яхши ўйин кўрсатмоқда.

- Ғузорликларда бош мураббий ўзгаргани жамоа ўйинида билиндими?

- Биласизми, биринчи даврада биз билан ўйингача ҳам "Шўртан"да мураббий ўзгарганди. Янги мураббий ўзини кўрсатади деган умиддаман.