Қизиқ статистика: “Бунёдкор” роппа-роса бир йил ўтиб, пенальти тепди
25 sep 2015 11:15
News

Қизиқ статистика: “Бунёдкор” роппа-роса бир йил ўтиб, пенальти тепди

Кеча олий лига 23-турини бошлаб берган баҳсда “Бунёдкор” Жиззахнинг “Сўғдиёна” клубини 2:0 ҳисобида мағлубиятга учратди.

Учрашувнинг 37-дақиқасида “Сўғдиёна” сардори Собир Ҳамидов ўз жарима майдончаси ичида Анвар Ғофуровга нисбатан қўполлик ишлатди. Вазиятга яқин турган бош ҳакам Азиз Асимов ҳеч иккиланмасдан пенальти белгилади.

Ушбу пенальти 2015 йилги футбол мавсумида “Бунёдкор” фойдаси учун белгиланган илк 11 метрлик жарима зарбаси бўлди. Бу йил ҳисобидан “қалдирғочлар” жиззахликларга қарши баҳсгача жами 35та (ОЧЛда 7та, чемпионатда 22та, кубокда 6та) учрашув ўтказишган ва уларнинг ҳеч бирида пенальти тепиш ҳуқуқига эга бўлмагандилар. Аксинча, юқоридаги рақамларда кўрсатилган баҳсларда “қалдирғочлар” дарвозаси томон жами 8та (ОЧЛда 4та, чемпионатда 4та) пенальти белгиланганди.

“Бунёдкор”нинг кечаги баҳсда “Сўғдиёна” дарвозасига киритган биринчи голини Шакер Зуаги пенальтидан амалга оширганини юқорида айтиб ўтдик. Бунгача “Бунёдкор” роппа-роса бир йил илгари, аниқроғи 2014 йилнинг 25 сентябрь санасида пенальти тепган эди. Ўшанда “Жар” стадиони “Насаф” дарвозаси томон белгиланган 11 метрлик зарбани Темур Аюпов голга айлантирганди.

Ортда қолган 22та тур якунига кўра, биргина “Бунёдкор” жамоаси пенальти тепмаган жамоа бўлиб турган эди. Бу серия 23-турга келиб йўққа чиқди.

Олий лига-2015да жамоаларнинг пенальти тепиш борасидаги кўрсаткичлари

Жамоа	Белгиланган пенальти	Урилган пенальти
ОЛМАЛИҚ	6	5
ПАХТАКОР	5	4
ЛОКОМОТИВ	5	3
АНДИЖОН	5	5
НАСАФ	4	3
СЎҒДИЁНА	4	2
НЕФТЧИ	3	2
МЕТАЛЛУРГ	3	3
ҚИЗИЛҚУМ	3	3
МАШЪАЛ	3	1
ШЎРТАН	2	2
НАВБАҲОР	2	1
ДИНАМО	1	1
БУХОРО	1	1
ҚЎҚОН-1912	1	1
БУНЁДКОР	1	1