“Қизилқум”: Мухлисларимиз Тошкентга боришади

Ҳозирда жамоа қошида расман “Мухлислар клуби” фаолият олиб бормоқда. Бу эса навоийлик ишқибозларнинг ўз севимли жамоаларини сафар учрашувларида ҳам бевосита стадионнинг ўзида туриб қўллаб-қувватлашлари учун кенг имкониятлар яратяпти.

Бунга дастлабки турнинг “Бунёдкор” — “Қизилқум” ўйини ҳам яққол мисол бўлади. Тошкентдаги учрашувни кузатиш учун юз нафарга яқин мухлис Навоийдан ташриф буюрган эди.

Уларнинг уюшқоқлиги ва фаолликлари 23 март куни Навоийдаги “Сўғдиёна” стадионида кечган “Қизилқум” — “Андижон” жамоалари баҳсида ҳам сезилди. Ўйин кучли ёмғир остида ўтганлигига қарамасдан навоийлик мухлислар ўз севимли жамоаларини ёлғизлатиб қўйишмади. Якунда “Қизилқум” иккинчи турда дастлабки уч очкони ўз ҳисобига ёзиб қўйди.

Режага кўра, мухлислар клуби аъзолари учинчи тур доирасида Тошкентда бўладиган “Пахтакор” — “Қизилқум” учрашувига ташриф буюришга қарор қилишган.

Мухлислар клуби 29 март куни эрталаб соат 6.00 да Навоий шаҳридаги “Сўғдиёна” стадиони олдида йиғилишади ва махсус автобусда йўлга отланишади.

Мурожаат учун телефон: +998913333773.