“Қизилқум” Анталияда Қозоғистон премьер лигаси вакилини мағлуб этди

Навоийликларнинг бу галги рақиби Қозоғистон премьер лигаси вакили “Каспий” клуби бўлди.

Актауликларга қарши беллашувнинг илк дақиқалариданоқ вакилларимиз ҳисобда олдинга чиқиб олишди. Матэ Вацадзега нисбатан ишлатилган қўполликдан кейин белгиланган пеналтини Георги Кухианидзе аниқ амалга оширди . Бўлим ўрталарига келиб қўшниларимиз мувозанатни тиклашди -1:1. Кейинчалик Элгужа Григалашвилида икки марта гол уриш учун яхши имконият бўлди. Биринчисида рақиб посбони жамоасини муқаррар голдан сақлаб қолган бўлса, кейинги вазиятда грузиялик легионернинг ўнг бурчакдан йўллаган кучли зарбаси дарвоза тўсинини титратди. Биринчи бўлимга томонлар шу ҳисобда йўл олишди.

Иккинчи бўлим аввалида яна вакилларимиз олдинга чиқиб олишди. Ойбек Қиличевнинг ўнг қанотдан узатиб берган тўпидан кейин рақиб ҳимоячилари пала партишликка йўл қўйишди ва Жасур Азимов вазиятда усталик билан фойдаланиб, яқин масофадан рақиб дарвозасини ишғол этди -2:1. Орадан ўн дақиқа ўтгач, “Каспий” сардори тўп учун курашда ҳимоячимиз Муҳсин Убайдуллаевдан чаққонроқ ҳаракат қилди ва Нестеров билан бирга бир вазиятга чиқиб бориб, яна ҳисобни тенглаштирди. Иккинчи бўлим ўрталарига келиб Георги Кухианидзе ўзини кўрсатди. У икки дақиқа ичида икки бор рақиб дарвозабонини узоқ масофадан кучли зарбалари билан доғда қолдириб, жамоамизнинг ишончли ғалабасини таъминлади.

Назорат учрашуви.   06.02.2021

“Қизилқум” (Ўзбекистон) – “Каспий” (Қозоғистон) 4:2

Анталия. “Титаник Лара” стадиони.

Голлар: Г.Кухаинидзе (3-пен, 66, 68), Ж. Азимов (50).

“Қизилқум”: Игнатий Нестеров (Артём Макосин), Файзулла Қамбаров (Азизбек Усмонов), Муҳсин Убайдуллаев, Шерали Жўраев, Салим Мустафоев, Эркин Байдуллаев, Ойбек Қиличев (Жамшид Ҳасанов), Жасур Азимов, Георги Кухианидзе, Элгужа Григалашвили (Беҳруз Саъдиллоев), Матэ Вацадзе.

Эслатиб ўтамиз, "Қизилқум"нинг Анталиядаги йиғини 12 февралга қадар давом этади. Ҳамиджон Актамов шогирдлари йиғин сўнгига қадар яна иккита назорат учрашувини ўтказишлари режалаштирилган.

"Қизилқум" матбуот хизмати.