Қиролнинг қайтиши: Златан яна А Серияда

Кейинроқ "россонери" президенти Адриано Галлиани аслида Златан ва Тиаго Сильвани сотишни истамагани, аммо молиявий қийинчилик туфайли шунга мажбур бўлганини айтганди. Аммо насиб қилган экан, Златан яна Италияга қайтди ва 38 ёшда ҳам топ-ҳужумчи бўлиш мумкинлигини барчага исботлаб қўймоқчи.

"Мен ҳурмат қиладиган клубим ва жуда яхши кўрган шаҳримга қайтяпман. Жамоадошларим билан мавсумни ўзгартириш ва барча мақсадларга эришиш учун қўлимдан келганча ҳаракат қиламан", — дейди Златан. У Италиянинг "Ювентус" ва "Интер" клубларида ҳам тўп тепган, бироқ айнан "Милан" сафида ҳозирги даражасига чиққан десак адашмаймиз.

Ибрагимович кетганига бир йил бўлганидан сўнг яна Милан шаҳрига қайтди, бироқ "кўк-қоралар" таркибига эмас, "қизил-қоралар" сафига келиб қўшилди. У Каталонияда ўзига бироз ўхшамади, аммо ўзини топа олди ва ажойиб ўйинлар  намойиш этди. Златан "Ювентус"да ҳам, "Интер"да ҳам А Сериянинг энг яхши тўпурари бўлди. Бироқ Аллегри "россонери" ўйинида уни асосий фигурага айлантирди. Златан аста-секинлик билан бўлса-да унга билдирилган ишончни оқлади. Қизиғи шундаки, швед "россонери"даги фаолиятини "Чезена" дарвозасига ура олмаган пенатьтидан бошлаганди. Умуман олганда, ўша "Милан"ни юлдузлардан ташкил топган жамоа деб бўлмасди. Неста, Индзаги ва Гаттузо аввалгидек кучли бўлишмаса-да, клуб ўз рақибларига бир амаллаб қаршилик кўрсатарди.

Ибрагимович эркин, муайян бир позицияга боғланиб қолмаганди ва ҳужумда мувозанатни сақлаб, ўзи хоҳлагандек ўйнарди. Аллегри қатъий схемалар тарафдори эмас ва шу билан бирга, футболчилар импровизация қилишини хуш кўрарди. Шу сабабли, Златан ва Аллегри ўртасидаги муносабат ҳавас қилса арзирли даражада эди. Ибра бирдек Пато ва Робинью билан ажойиб трио ташкил этган ва уларнинг барчаси 14тадан гол уришга эришганди. Златан яна кўпроқ ўйнаши мумкин эди (ўша мавсум нафақат гол урди, балки 11та голли узатма ҳам берди). Лекин қизил карточка олиб, дисквалификация қилинди. Оммавий ахборот воситалари уни буюк Марко Ван Бастен билан таққослай бошлади, Италия футбол федерацияси эса уни мавсумнинг энг яхши футболчиси деб эътироф этди. "Милан" эса кутилмаганда мамлакат чемпионига айланди. Бу борада Ибрагимовичнинг хизматлари улканлиги ҳеч кимга сир эмас.

"Қизил-қоралар" сотиб олиш ҳуқуқидан фойдаланиб, ўйлаб ҳам ўтирмай Ибрагимович учун 24 миллион евро сарфлади. 2011/12 йилги мавсумда Ибрагимович сезиларли даражада кучайиб кетди. "Милан" эса жуда кучсизланиб қолган эди ва Златаннинг бир ўзи клубни олдинга тортаётганди. Робинью ва Пато иккаласи биргаликда 7та гол урди, Златан эса ўшанда рақиб дарвозасини 28 маротаба ишғол қилишга улгурганди (бирортаси ҳам пенальтидан урилмаган). Чемпионлик мавсумидан кейин жамоа қанчалик заифлашиб қолганини ҳисобга олсак, статистика жуда ҳайратланарли! Албатта, Златан кейин кетма-кет йилнинг энг яхши футболчиси бўлди, "Милан", агар Ибра бўлмаганида, 2-ўрин ҳақида орзу ҳам қилмасди ва катта молиявий йўқотишларга дучор бўлиши муқаррар эди.

Шундай қилиб, Златан катта фойдаси теккан клубга яна қайтмоқда. Хўш, ҳозир "Милан"нинг аҳволи қандай?! Клуб турнир жадвалида 11-поғонани эгаллади, ўтган тур эса "Аталанта"га 0-5 ҳисобда мағлуб бўлди. Ибрагимович қийинчиликлардан ҳеч қачон чўчимаган, бироқ бу мавсум унинг фаолиятидаги энг қийини бўлиши мумкин. Ҳа, 35 ёшида АПЛга кетиши дадил қадам бўлган, бироқ 38 ёшида клуб етакчиси бўлиб, жамоа юқори чўққига чиқишида ёрдам бериши шарт. Ибрагимовичнинг таъкидлашича, у кўплаб ўйинчилардан ёмон эмас ва буни амалда исботлаш учун бел боғлаган. "Мен А Серияда 20та гол ура оламан", — деди Ибрагимович.

Пиоли "ноёб бриллиант"дан қандай фойдаланишини кузатиш жуда қизиқ. Ҳаёлга биринчи бўлиб 3-5-2 ва 4-3-3 тактикалари келмоқда. Эҳтимол, мураббий Златандан якка плеймейкер сифатида фойдаланар. Бу эса Кшиштоф Пентек учун яхши янгилик эмас. Қолаверса, Пиоли ҳам польшалик ҳужумчини унчалик хушламайди. Златаннинг келиши эса у захира ўриндиғида ўтириб қолиши ёки ижарага кетиш учун бирор клуб излашига сабаб бўлади. Уларни жуфт ҳолда тасаввур қилиш жуда қийин. Сабаби Пентек ягона кучли форвард бўлишни ёқтиради. Бироқ энди Златан бор экан, унинг истаклари амалга ошмайди. Леао эса Ибрагимович учун идеал ҳамроҳ бўлиши мумкин: бразилиялик жуда тезкор ва чаққон ўйинчи.

Ибрагимовичдан сеҳрни кутиш керакми? Албатта! Златан шундай клубда ҳам нималарга қодир эканини кўрсатиб қўяди. Асосийси, жисмоний формаси унга панд бермаса бўлгани. Ибрагимовичнинг ёнида бошқа футболчилар ҳам ўсиши мумкин. "Милан" сафида энди ҳақиқий етакчи пайдо бўлди десак, муболаға бўлмайди.

Златан умуман ўзгармайди, у ўзини бенуқсон деб атади ва буюклигини такроран исботлашга, Италияни лол қолдиришга ваъда берди. Унинг бу ғайрати барча нарсани қўлга киритган ва осонгина пул топиш илинжида юрган, айниқса футбол ўйнай олмай авантюра (қимор) йўлига кириб кетадиган инсонлар учун ўрнак бўла олади.

Муаллиф: Сергей Румянцев
Таржима: Нозима Зарипова