Превью. "Ювентус" - "Барселона"

• Иккала жамоа учун бу саккизинчи Чемпионлар Кубоги финали

• Массимилиано Аллегри "Ювентус" сўнгги қадам ташлашига ишонади

• Луис Энрике: "Биз, ўзимиз хоҳлаган жойдамиз"

• "Юве" ҳимоячиси Жоржио Кльеллини жароҳат туфайли ушбу учрашувни ўтказиб юборади: Хави Эрнандес "Барса" сафида сўнгги ўйинини ўтказади

• "Барселона" сўнгги 10 йил ичида тўртинчи чемпионликни нишонлаши мумкин, "Ювентус" эса тарихдаги учинчи совринини қўлга киритишга яқин турибди

Тахминий таркиблар

"Ювентус": Буффон; Лихтштайнер, Бонуччи, Бардзальи, Эвра; Погба, Пирло, Маркизио, Видаль; Тевес, Мората.

Ўйнамайди: Кьеллини (жароҳат), Касерес (жароҳат)

Сўроқ остида: Бардзальи (жароҳат)

"Барселона": Тер Стеген; Алвес, Пике, Маскерано, Альба; Ракитич, Бускетс, Иниеста; Месси, Суарес, Неймар.

"Ювентуса" бош мураббийи Массимилиано Аллегри: 

Месси, Неймар, Суарес... Ярим финалдан сўнг бу "учлик"ни қандай тўҳтатса бўлади деган саволни жуда кўпчилик бермоқда. Финалда жуда совуққонлик билан ўйнашимиз талаб этилади. Бизни дуранг натижаси қониқтирмайди. Шу боис гол уриш ҳақида бош қотиришимиз керак. Биз ёки "Барселона" "требл" қайд этиши аниқ. Умид қиламанки, биз буни уддалаймиз. Бу нарсани амалга ошириш осон кечмайди. Топ жамоани бошқариш жуда қийин иш. Бу нарса ташқаридан қанчалик осондек туюлмасин, лекин аслида жуда мушкул. Луис Энрике "Рома"ни бошқаришдан ишни бошлаганди. Бироқ энди бу мусобақа умуман бошқа мусобақа ва бошқа даража. Энрике "Рома"да ҳам ўз ишига жуда тўғри ёндошган эди. 

Финал буюк ўйин бўлиши лозим. Бизга бироз омад кулиб боқиши талаб этилади. Лекин бу омадга ўз меҳнатимиз билан эришимиз керак. 

Биз "Барселона"ни қандай тўхтатишни эмас, уларга қандай гол уришни ўйлашимиз даркор. 

Биз техник футбол ўйнашимиз зарур Рақиб айнан шу ҳижатда жуда кучли ҳисобланади. Уларнинг асосий қуроли бу ҳужум. Финалда нима бўлишидан қатъий назар ушбу мавсум биз учун жуда яхши кечди. Италия чемпионлиги ва Италия Кубоги соҳибига айландик.  Жамоа 20 йилдан буён Италия Кубогида муваффақият қозона олмаётган эди. Европада ҳам соврин ютишимиз жуда муҳим. Учрашув давомида диққат-эътибор билан ҳаракатланишимиз лозим. Финал фаворити "Барселона" эканлигини эсдан чиқармаслигимиз керак.

"Барселона" бош мураббийи Луис Энрике:

Жамоамиз ўзи истаган натижаларни қайд этиб келмоқда. Биз шу вақтгача иккита совринни ютишга эришдик. Энди навбат учинчисига. Майдоннинг ўрта чизиғи ҳужум ва ҳимоя учун асосий жой. Биз ҳимояда ҳам, ҳужумда ҳам етакчилик қилишимиз керак. "Барселона" ўз ўйинини кўрсатиши лозим. Тўпни тўлиқ назорат қилиб, рақиб дарвозаси олдида вазиятлар яратган ҳолда уларга ўйнаш имконини бермаслигимиз зарур. 

Ўйлашимча, тўп назорати бизнинг қўлимизда бўлади. Биз учрашувни кўп қисмини рақиб жарима майдончаси олдида ўтказишни режалаштирганмиз. Финалда юқори даражада ўйнашимиз талаб этилади. Финал осон кечмайди. "Ювентус"нинг ўйин услуби ҳам бизникига ўхшаб кетади. Уларга ҳам тўп керак. 

"Ювентус" ҳимояда жуда кучли. Айнан шу учун ҳам уларда ҳам "требл"ни нишонлаш имконияти бор. Жуда эҳтиёткорлик билан ўйнашимиз керак.

Биз ушбу мавсумда жуда кўп гол киритидик. Лекин унутмаслик керакки, бу финал. Финал эса умуман бошқа типдаги ўйин. Бу ерда жуда юқори босим остида қоласиз. Шу босимни енгиб ўтишга ҳаракат қиламиз. 

Қайси жамоа босимни енгиб ўта олса, ўша клуб якунда муваффақият қозонади. 

Мен ўз фаолиятимдан миннатдорман. Футболчилик фаолиятимни 2004 йилда якунлагандим, ҳозир мураббий сифатида ишлаяпман. Фаолиятимни қўлга киритилган совринлар билан ўлчамайман. Нима бўлган тақдирда ҳам фаолиятимни боришидан миннатдорман. Мен гранд жамоани бошқариш қандай эканлигини жуда яхши биламан. Мен ўз ишимни бажараман, бу одамларга қанчалик ёқиши ёки ёқмаслиги иккинчи даражали.

Сўнгги учрашувлар

"Верона" - "Ювентус" 2:2 (Тони 48, Хуанито 90+3; Перейра 42, Льоренте 57)

"Атлетик" - "Барселона" 1:3 (Уильямс 79; Месси 20, 73, Неймар 36)