Пляж футболи: Терма жамоада янги номлар пайдо бўлиши мумкин

Қайд этиш жоиз, 15-19 июль кунлари Қарши шаҳрида пляж футболи бўйича VIII Ўзбекистон Кубоги баҳслари бўлиб ўтди. Кубок ўйинлари якунига етгач, 20-24 июль кунлари Қаршида пляж футболи бўйича VIII Ўзбекистон Чемпионати ўйинлари ўтказилди.

Эътиборлиси, ҳар иккала турнирнинг финал баҳсида Қаршининг икки жамоаси - «Дустлик-AIN» ва «Насаф» клублари ўзаро ғолиблик учун кураш олиб боришди ва ҳар иккала финалда ҳам «Дустлик-AIN» рақиби устидан ғалаба қозонди. Кубок финалида «Дустлик-AIN» «Насаф» устидан 8:3 ҳисобида ғалаба қозонган бўлса, Чемпионат финалида 6:3 ҳисоби қайд этилди ва «Дустлик-AIN» Ўзбекистон чемпиони номига сазовор бўлди.

Пляж футболи бўйича Ўзбекистон терма жамоаси бош мураббийи Аҳад Юсуповнинг қайд этишича, Кубок ва Чемпионат баҳслари терма жамога янги футболчиларни саралаб олишда ёрдам беради. Эслатиб ўтамиз, пляж футболи бўйича Ўзбекистон терма жамоаси шу йилнинг ноябрь ойида бўлиб ўтадиган пляж спорт турлари бўйича IV Осиё Ўйинларида иштирок этади.

«Чемпионат ва Кубок ўйинлари менда катта таассурот қолдирди. Ҳар иккала мусобақа жуда қизиқарли ўтди ва энг аҳамиятлиси, терма жамоага янги номзодларни саралаб олишимизга имкон берди», - дейди Аҳад Юсупов.

«Пляж футболига қизиқиш ошиб бораётгани муҳим. Бу спорт тури билан қанча кўп одам шуғулланса, уни ривожлантириш ҳам шунча осон кечади», - дейди Юсупов.

Ноябрь ойида ойида пляж спорт турлари бўйича Осиё Ўйинларида иштирок этамиз. Унгача терма жамоа иштирокида бир қанча йиғинлар ташкил этишни ва шу йиғинлар орқали якуний таркибни аниқлаб олишни мақсад қилганмиз. Умид қиламанки, турнир бошлангунича яхши спорт формасига киришга улгурамиз ва мусобақада ижобий натижа қайд этишга ҳаракат қиламиз», - деди терма жамоа бош мураббийи.

Маълумот учун, пляж спорт турлари бўйича IV Осиё Ўйинлари ноябрь ойида Таиланднинг Пхукет шаҳрида бўлиб ўтади. Мазкур Осиё Ўйинларида жами 19та спорт тури бўйича спортчилар ғолиблик учун курашадилар. Осиё Ўйинларинг футбол мусобақаси эса 14-20 ноябрь кунлари оралиғида ўтказилади ва унда Осиёнинг 16та терма жамоаси иштирок этади.