ПФЛга яна қатъиятлик етишмаяпти!

Шунинг учун ҳам отанинг талаб ва истакларига бўйсуниш талаб этилади. Чунки у отада. Ҳар холда катталар шундай деб ўргатишади. Ўзбек футболида Профессионал футбол лигаси ташкилоти иш бошлаганида гуёки кўпчилик мана энди футболимизда сезиларли олдинга қадам ташлаш кузатилади. Чунки ПФЛ ўз номи билан ПФЛдир қабилидаги фикрлар илгари сурилганди. Аммо мана бир неча йилларки ушбу ташкилотнинг фаолияти ОАВда кўпинча танқид остига олиб келинмоқда. Танқид келажак меваси дейишади, агарда у ҳақиқатдан ҳам тўғри танқид бўлса. ПФЛга аслида нима етишмаётгани ҳақида устоз ҳамкасб акаларимиз жуда кўп ёзишди. Юртимизда янги чемпионат бошланганига ҳам мана бир ойдан ошиқ вақт ўтди. Кўриб турибмизки, ПФЛ бу йил ҳам ўша ўша савияда ишламоқда. Аввалги йилларга нисбатан айтарли жиддий ўзгариш ёки янгилик яратилмади. Боз устига ПФЛга қатъиятлик етишмаяпти.

КУБОКДА БИРИНЧИ ЛИГА ЖАМОАЛАРИ ТАҚДИРГА ТАН БЕРДИМИ?
Мавзуимизнинг асосий қисми бу ПФЛга қатъиятлик етишмётганига қаратилган. Хусусан  Ўзбекистон Кубогининг 1/16 финал босқичида олий лига клубларига қарши ўйнаши керак бўлган айрим биринчи лига клублари тақдирга тан берганми? Чунки ўз майдонида олий лига пешқадами “Пахтакор”ни қабул қилиши керак бўлган “Хоразм” бу ўйинни Хивада эмас (“Хоразм” бу йил рақибларини Урганчда эмас, Хивада қабул қилмоқда – И.Р) балки Тошкентда ўтказишни ПФЛга мурожаат этиб сўраган. Нима учун бундай қарорга келингани очиғи бизга қоронғу. Бу борада шахсий фикримизни билдирадиган бўлсак, нахотки клуб раҳбарлари хоразмлик ашаддий ишқибозларни манфаатидан кўра ўзларини ўйлаган бўлса. Футбол мухлислар учун деб доимо айтиб келинган. Хўш, унга амал қилиняптими?

Ҳақиқатдан ҳам футбол шинавандалари учун ўйналяптими ёки шунчаки расмиятчилик чунки ўтказиляптими? “Хоразм” – “Пахтакор” ўйинини кўришни бизнингча бутун Хоразм ахли интиқлик билан кутаётган бир пайтда учрашувни Тошкентга кўчириш тўғримикин? Ахир вохаликлар йилда бир маротаба бўлса ҳам, асли хоразмлик бўлган ва бугунги кунда “Пахтакор”нинг асосий фигураларидан бири бўлмиш Жамшид Искандеровни ўз кўзлари билан Хивадаги стадионда кўришни истаганлар қанча? Эсимда “Хоразм” илгари олий лигада ўйнаганда “Пахтакор”га қарши ўйинларда стадион трибунаси томошабинлар билан лиқ тўларди. Мана шундай қарама-қаршиликларни хоразмликлар соғиниб қолишгани аниқ. Таҳминимизча “Хоразм” бўлажак ўйинни пойтахтда ўтказишни сўраганини сабаби бу майдоннинг яхши эмаслиги билан боғлиқ бўлса керак. Яна ким билади дейсиз.

Нима бўлган тақдирда ҳам учрашув Хивада ўтказилса мақсадга мувофиқ бўларди. Бу билан “Хоразм” тақдирга тан бериб, уйда ютқаздик нимаю, сафарда ютқаздик нима дегандек туюлмоқда. Тўғри тушунинг биринчи лига клублари Кубокда олий лигага жамоаларига қарши ўйинлардан олдин мағлубиятни олдиндан тан олаётгандек гўё. Йўқса улар бу борада шов-шув уйғотиш мақсадида ҳам жиддий курашган бўларди. Албатта бугунги “Хоразм”  ва “Пахтакор”ни бир-бири билан таққослаб бўлмайди. Олий лига вакили урганчликлардан ҳар томонлама устун. Лекин бу мағлубиятни олдиндан тан олиш дегани эмас. Чунки футболда ҳамма нарса бўлиши мумкин.

Мана шундай холат “Бунёдкор-2” – “Насаф” қарама-қаршлигида ҳам такрорланди. Яқинда ПФЛ расмий сайтида чиққан хабарга кўра Тошкентда ўтказилиши керак бўлган мазкур баҳс ҳам Қаршига кўчирилган. Таркиби асосан 1994 йил ва ундан кичик ёшдаги футболчилардан иборат бўлган “Бунёдкор-2” Кубок баҳсларини дастлаб Тошкентнинг “Обод” жамоасига қарши бошлаб 7:2 ҳисобида ғалабага эришганди. Кейинчалик тақвимга кўра ёш “қалдирғочлар” 1/16 финал босқичида “Насаф”га қарши ўйнаши маълум бўлди. 19 апрель куни “аждарлар” пойтахтга келиши лозим бўлган бир пайтда ПФЛ бу баҳсни ҳам иккала жамоанинг ўзаро келишувига кўра Қаршида ўтказилишини маълум қилди. Тошкентда майдон билан боғлиқ муаммо йўқлигини инобатга олсак, бунга нима мажбур этганини очиғи тушунмадик.

БИРИНЧИ ЛИГАДА ЎЙИНЛАР ТУШЛИК ПАЙТИДА ҲАМ ЎТКАЗИЛМОҚДА БУНДАН КИМ ЮТМОҚДА?

ПФЛ бу йилги биринчи лига ўйинларига ҳам жиддий эътибор қаратмаётгандек. Чунки ҳаммаси ўша ўша. Аслида ушбу лига иштирокчиларидан бир нарса талаб этиш ҳам қийин. Чунки деряли ҳаммаси чемпионатда аранг қатнашаётгандек. Профессионаллик ўтиш учун қилиниши лозим бўлган жиҳатларни клуб раҳбарларига айтсангиз сизни эшитгиси ҳам келмайди. “Мақсадимиз кучли саккизтакликка кириш” ёки “Маҳаллий ўйинчиларимизни олий лига клубларига тайёрлаб бериш” қабилидаги гапларни ҳаммаси ёдлаб олган. Ҳаммада шу гап. 2-3та клубдан ташқари қолганларнинг асл мақсади ҳам ҳокимят томонидан ажратилган пулларни йил давомида турли усуллар орқали сарф этишдир. Фарҳод Магометов бу йил биринчи лиганинг айрим клубларида тафтиш комиссия ўтказилишини айтганди. Бизнингча бунга лига иштирокчилари тайёр эмас. Сабаби уларнинг кўпларида база ва стадион йўқ. Гарчи ўз стадионига эга бўлмасада, ПФЛ уларни чемпионатда иштирок этишига руҳсат бермоқда. Шунинг учун ҳам клубларимиз масъулиятсиз бўлиб кетмоқда. Чемпионат бошланишини оз вақт қолганида бекор юрган  футболчиларни ўз таркибига қўшиб олиб, ПФЛга ишончнома хати билан мурожаат этиб мусобақада иштирок этиш айрим жамоаларни одат тусига айланган.
Ўз стадионига эга бўлмаган клублар (аслида уларни клуб деб аташ ҳам тўғри бўлмаса керак) ижара асосида ўзга стадионлардан фойдаланмоқда.

Аксарият холларда мана шу холат кишини бироз ўйга солмоқда. Мисол учун 3-турдан ўрин олган “НБУ-Осиё” – “Косонсой” баҳси “Жар”даги машғулотлар майдонида ўтказилди. Учрашув 12:00да бошланишини эшитиб хайрон қолдик. Тўғри, ПФЛ регламенти бўйича 12:00 ва ундан кейин ўтказилса бўлаверади. Лекин бу ўйинни айнан тушлик пайтига қўйилгани тўғримикин? “НБУ-Осиё”ни мухлислари йўқ шекилли, шунинг учун ҳам уларга қайси вақтда ўтказилишини фарқи бўлмаса керак. Бу борада клуб расмийлари билан суҳбатлашганимизда шу куни “Жар”даги асосий майдонда “Бунёдкор” – “Локомотив” учрашуви ўтказилиши муносабати билан шундай қарорга келинганини айтишди. Косонсойликларнинг 12:00га бироз кечикиб келгани натижасида учрашув 12:30ларда бошланган. Шунга қарамай меҳмонлар учрашувда 2:0 ҳисобида ғалаба қозонган.

Кейинчалик биринчи лигада яна бир ўйин 12:00да ўтказилди. “Локомотив-БФК” – “Истиқлол” учрашуви “Дўстлик” стадионида тушлик пайтида ўтказилган. Кун чўққига чиққан пайтда футболчиларнинг ҳам 90 дақиқа майдонда чопиши осон бўлмаса керак ҳар холда.

Тошкентда ўзи олий лига ўйинларига мухлислар кирмаётган бир пайтда биринчи лига учрашувларига ким ҳар кирарди деб ўйланиб қоласан киши?!

Шунингдек биринчи лигадаги стадионлар ҳақида шуни ҳам айтиб ўтиш керакки, айрим стадионларда ўйин натижасини кўрсатиб турувчи табло йўқ. Ўйинга бироз кечикиб келган мухлис учрашувда қандай натижа қайд этилаётганини бошқалардан сўраб билишга ҳаракат қилади.

Кўряпсизми клублар ўзаро келишувга эришиб хоҳлаган вақт ўйинни ўтказишмоқда. Наҳотки профессионал футбол лигаси ташкилотидаги раҳбарлар бунга йўл қўйиб беришаётган бўлса? Футбол мухлислар учун шиори қаерга кетмоқда?

Ўйинларни худди байрамдек ўтказиб мухлисларга хурсандчилик улашиш учун ўз ишига сидқидилдан ёндошадиган клублар жудаям кам! Бошқалардан ўрганиб уларни амалда жорий этишдан уялиш керак эмас. Шундай экан ҳеч қачон бундан уялманг ҳурматли биринчи лига клуби раҳбарлари!

Исломбек Рустамбеков.